Дәәчнрт нөкд болв

Нег һазра улс цергә шишлң керг-үүлдврт орлцачнрт даңгин кергтә тоот илгәҗ дөңгән күргнә. Шидр Хальмг Таңһчин селәнә эдл-ахун министерствин, таңһчин казначействин болн Н.Н.Пальмовин нертә келн-улсин музейин көдләчнр болн Элстин 12-ч тойгта дунд сурһулин багшнрла болн сурһульчнрла хамдан буйнч седклин дөң цуглулад, СВО давҗадг һазрур йовулв.

Тер мет «50 лет Октября» болн тохма мал өскдг «28 Әәрмин нертә» эдл-ахус эн дөң хуралһнд нөкд болв.
– Нег һазра селәнә эдл-ахун эд-тавр кеҗ һарһдг арһлачнр мана дәәчнрт дөң-тусан даңгин күргдгинь келх кергтә. Махна зүүтә хот-хол, тутрһ болн талдан тоот илгәгднә. Таңһчин фермермүдт ханлтан өргҗәнәв, эврәксән хайдмн биш, – гиҗ селәнә эдл- ахун министрин үүл дааҗадг Гаван Тимур темдглв.
Тодлхд, одахн Гаван Тимур «Дәәч» төвин һардач Җаңган Чимидлә хамдан «Фронтд нөкд болсн төлә» медальмүдәр нег һазра фермермүдиг ачлв.
Өдгә цагт амр биш бәәдлд туссн мана дәәчнрт ямр чигн дөң туста болна. Бидн цуһар тедниг дөңнх зөвтәвидн. Хамдан олна диилвр өөрдүллһнд тәвцән орулхмн.
КАРСАНА Евгения