Ик-бичкн уга демән өгв

Приютна районд «Зүркни дуудврар 08» гидг сән дурар үүлддг улсин ниицәнә гешүд цергә шишлң керг-үүлдврт орлцҗах нег һазра улст дөң-тусан күргҗ, буйнч седкләрн кесг керг күцәв. Эн ниицәнә ханьд Приютное, Нарта, Үлдчн селәдин улс орна, эдн арһ-чидлән хамцулад, цергчнриг дөңнлһнә керг-үүлдврмүд хамдан давулна. Шидр Үлдчн селәнә бәәрн улсин седвәрәр «СВОих не бросаем» гидг буйнч седклин керг бүрдәгдв. Терүнд ик-бичкн уга орлцад, ут тоодан 165 миңһн арслң цуглулв. Бичкн селәнә әмтн нег өдрин туршарт баһ биш мөңг цуглулҗ, цергә даалһвран күцәҗ йовх нег һазра улст дөңгән күрглһнә кергт ик тәвцән орулснь бахмҗта.

- Эн керг-үүлдврин йовудт бидн яарм, олн зүсн белг шүүҗ авлһна лотерей, Үлдчн болн Нарта селәдин эврә сән дурар үүлддг улсин багмуд хоорнд наад давулвидн, цергчнрт кергтә дулан хувц, хот-хол, нань чигн кегдл цуглвидн. Хөөннь бәәрн билгтнрин концерт болв. Мана селәнәхн ик-бичкн уга демән күргәд, эн кергт тәвцән орулв. Үлдчнд өсәд-босад талдан һазрт йовх әмтн бас демән күргв, хам-хоша бәәдг селәдт, Элст балһснд бәәдг улс бас орлцснь байрта. Мана селәнә дунд сурһулин күүкд-көвүд цуһар эн кергт шунмһаһар орлцснд бидн ик ханлт өргҗәнәвидн. Иим керг-үүлдврт орлцад, цергә даалһвран күцәҗ йовх нег һазра улсиг дөңнснь мана бичкдүд болн баһчуд чик сурһмҗта, төрскнч секдлтә болҗ өсчәхнь ил үзүлнә. Өрк-бүл болһн чадсарн дөңгән күргв, цуһар бидн ниитә болхла ямаран чигн кергиг күцәҗ чадхвидн, – гиҗ эн керг бүрдәсн улсин нерн деерәс Чирән Жанна келв.
Селәнә күүкд улс зунар болн намрар эд-бод кесн олн зүсн зер-земш болн темс, һуйрин болн махна зүүтә хот-хол авч ирҗ яармд хулдв. Кесгнь дулан өөмс, беелә өлгәд авч ирв. Приютное селәнә болн бәәрн арһлачнр бас эврәннь кегдлмүдән яармд хулдҗ мөңг хоршахин төлә өгүлв. Селәнә күүкд улс Антудина Людмила, Кармаша Нелли, Цевгә Раиса, Очра Анна, Хавала Валентина, Шуракчин Раиса болн нань чигн кесг күн олн зүсн хот-хол кеҗ яарм болн лотерей давулхд тусан күргв. Эн селәнд өсәд-боссн Әрәсән күүкд улсин ниицәнә Хальмг Таңһчд үүлддг әңгин ахлач Кинзән Киштән, филолог номин доктор Манҗин Байрта, Санкт-Петербург балһснд бәәдг Эрднин Арслң болн талдан улс эн кергт бийснь орлцҗ эс чадсн болв чигн демән күргв. Эн керг-үүлдвр бәәрн арһлач Мулан Николайин «Теегин айс» кафед болв. Селәнә эврә сән дурар үүлддг улсин багд ордг Чирән Жаннан темдглсәр, буйнч седклин кергт орлцсн күн болһна нериг заахин төлә газетин халх баһ болхнь лавта. Селәнд бәәдг өрк-бүл болһн тәвцән орулхар шунв. Ах улсар үлгүр авч сурһульчнр болн баһчуд ард үлдсн уга.
- Цергә даалһвран күцәҗ йовх мана көвүд эн кергт орлцснь темдгтә. Ода эдн гертән амрлһнд бәәнә, удл уга дәкн цергә керг-үүлдврт орлцхар одхмн. Приютна района муниципальн бүрдәцин толһач Манҗикә Басң эднд нисдг кергсләс харсдг эв-арһ белглв. Мана селәнәхн хортнас бултдг шишлң хувц өлгәд, бас көвүдт бәрүлҗ өгв. Амрлһнд герүрн хәрҗ ирсн көвүд икр ах-дү болна, эдн хамдан цергә керг-үүлдврт орцлҗана. Нег һазра улс мана цергчнриг дөңнҗ аһу ик көдлмш күцәҗәхиг эдн өөдәнәр үнлҗ, олн-әмтнә буйнч седкл күнд цагла ик урмдта болна гиҗ келснь мана үүлдвр ик чинр зүүҗәхиг иткүлв, – гиҗ Жанна Максимовна келнә.
Буйнч седклин керг-үүлдврин медлд хоршасн мөңгәр үлдчнәхн «Булат» гидг кергсл хулдҗ авад, амрлһнд ирсн ахнрт бәрүлҗ өгхмн. Удл уга талдан көвүд бас амрлһнд ирхмн гиҗ күләгдҗәнә, дәкәд нег кергслиг теднд өгх шиидвр авгдв. Шидр эврә сән дурар үүлддг улсин баг Дивное селәнд одад, тенд бәәрн улс нисдг кергсләс харсдг шишлң көнҗл кедгиг үзүләд, дамшлтарн хувалцв. Келхд, хам-хоша бәәдг селәнә эврә сән дурар үүлддг улс мана цергчнрт тиим 4 көнҗл белглв. Ода үлдчнәхн бас тиим кегдл уйдг керг бүтәх саната.
ДООҖАН Наталья
ЗУРГТ: Приютна района Үлдчн селәнд болсн буйнч седклин кергт орлцачнр