Селәнә улсиг эмннә

Күн болһн тааста эрдм шүүҗ авад, насн-җирһлиннь туршарт көдләд, олнд туста болхар зүткнә. Ик Буурла района Приманыч болн Баһ Буурл селәдин әмтн эмч Очан Светланаг күндлҗ, цаһан седклтә, тевчңгү, түрүн дуудврар дөңгән күргхәр адһна гиҗ темдглнә. Светлана Тавуновна һучн шаху җилдән эрүл-менд харлһна халхд үнн-чик седклтәһәр көдлҗ, эн җилмүдин эргцд кедү күүнд дөңгән күргҗ олн зүсн гемәс эдгхд тусан күргсиг тоолхд зөвәр берк болхнь лавта. Бичкнәсн авн эмч болх сана зүүҗ йовсн төләдән тааста эрдмәрн көдлҗ йовхнь күүкд күүнд ик дааврта болна.
Әәдрхн балһснд медицинск ик сурһуль төгсәһәд, эн Ик Буурла района эмнлһнд бичкдүдин эмч болҗ күч-көлснә хаалһан эклсмн. Светлана Тавуновна бийнь Ик Буурлд өсәд-боссмн, нааран хәрд һарад, 1998 җиләс авн Приманыч селәнә эмнлһнд көдлдг болв. Тер цагт селәнд эврә эмнлһн үүлдҗәсн билә, тегәд бәәрн улс цуг кергтә тәрлһ, эмнлһ дор ормдан авдг бәәсмн. 2004 җилд Светлана Тавуновна түрүн арвн эмчин тоод Москва балһснд мергҗлтән өөдлүләд, олна дамшлтын эмч болҗ көдлдг болв. Селәнә эмнлһнә улд олна дамшлтын эмчин офис (ОВОП) секгдв. Тер цагас авн Очан Светлана Приманыч болн Баһ Буурл селәдин әмтнә эрүл-мендин бәәдл харҗ, бөдүн улст болн бичкдүдт түрүн дөңгән күргҗәнә.
- Мини хәләврт ут тоодан 1115 күн бәәнә, теднәснь өрәлнь медәтнр болна. Олн зүсн гемәс иштә дөрвн күн гертәсн һардг арһ уга, тегәд эднд онц оньг тусханав. Тер мет хойр селәнд ода 84 бичкн бәәнә. Батлгдсн диг-дарала ирлцәтәһәр бидн әмтнә эрүл-мендин бәәдл шинҗлҗ, олн зүсн гемәс саглуллһна тәрлһ кенәвидн, сурһульчнр дунд чик авг-бәрцин төрмүдәр күүндвр тогтанавидн. Шидр мана селәдин әмтн «Эрүл-менд бәәтн» гидг керг-үүлдврт орлцад, мергҗлтнрин шинҗллтд орад, эмнлһнә туст сүв-селвг авв. Ут тоодан 107 күн эмчд бийән үзүлв. Хойр күүнд диспансеризацин йовудт цуснднь шикрин кемҗән өөдлснь илдкгдсн билә, тегәд эдн эндокринолог эмчлә харһҗ күүндв. Эн өдрмүдт эк-эцкин хәләвр уга үлдсн насни дигт күрәд уга бичкдүдин эрүл-мендин бәәдл бас шинҗлхвидн. Хойр селәдин әмтн тас уга болад, ямр нег өвчн зоваһад эмнлһнд күргх кергтә болхла бидн района эмнлһнәс түргн дөң күрглһнә шишлң көлг дуудҗ авнавидн. Маднд эврә көлгн уга, эмнлһн бәәршлҗәдг герт сән ясвр бас кергтә, – гиҗ Светлана Тавуновна келнә.
Сән таал уга болв чигн селәнә эмнлһнә көдләчнр көдлмшән үнн-чик седклтәһәр күцәҗ, нег һазра улст сән чинртә дөң күргхәр шунҗ көдлнә. Тамара Джиджаевна Синникова селәнә эмнлһнд медицинск эгчәр тәвн җилдән көдлҗәнә. Эн фельдшер Боджан Сәәхәд үлгүр-үзмҗ болҗ, байн дамшлтарн хувалцҗ, ямр нег төр учрхла сүв-селвгән өгч, дөң болна. Боджан Сәәхә давсн җиләс авн «Земск фельдшер» гидг көтлврин медлд нааран ирв, эн эрүл-менд харлһна халхд хөрн тавн җилдән көдлҗәнә. Баһ Буурл селәнд 2023 җиләс авн көдлҗәдг фельдшер Валентина Лизинова бас «Земск фельдшер» гидг көтлврт орлцв. Сүл цагт орн-нутгин һардвр селән һазрт көдлдг эрүл-менд харлһна көдләчнриг урмдулҗ, немр мөңг өгдг болв, эмнлһст сән таал тогтаҗ шин бүрдәцс тосхчана. Селән һазрт бәәдг әмтн сән чинртә дөң авч, дарунь эмнхин төлә эн төрмүд хаһлгдҗана.

ДООҖАН Наталья
ЗУРГТ: Ик Буурла района Приманыч селәнә эмнлһнә көдләчнр