Цергчнрин өрк-бүлмүдт нөкд болна

Эндр мана орн-нутгт цергә шишлң керг-үүлдврт орлцачнрин өрк-бүлмүдт онц оньган тусхана. Эн туст Әрәсән Президент Владимир Путинә седвәрәр 2022 җилин үкр сард дәәчнрин өрк-бүлмүдин кергүдәр үүлддг комитет орн-нутгин регионмудт бүрдәгдв.
Тиим комитетмүдиг СВО-д орлцачнрин өөрхн улс һардҗ көдлх зөвтә гиҗ батлгдв. Хальмг Таңһчд үүлддг тиим комитетиг 2024 җилин ноха сарас авн цергә шишлң керг-үүлдврин йовудт авалян геесн, седвәртә, төрскнч седклтә Кокан Виталия һардҗана.
Виталия Аркадьевнан келсәр, СВО-д эцкән, авалян, көвүн үрән геесн өөрхн улст эдн дөң-нөкд болна. Юридическ, психологическ болн талдан халхар дөң күргдг болв. Тер мет һанцарн бәәдг цергчнрин экнрин гермүдинь ахулҗ, хаша-хаацинь яслһнд эдн бас нөкд болна.
Цергә шишлң керг-үүлдврт әмнәсн хаһцсн дәәчнрин өөрхн элгн-садн болн шав авсн улст шаңһас мөңгн йилһгднә. Хальмгин юристнрин Ассоциац эн туст дөңгән күргнә. Тиим кевәр комитет таңһчин олн бүрдәцслә нөкцлтҗ көдлнә, гиҗ темдглх кергтә.
Терүнәс нань комитет төрскнч седкл сурһмҗллһнә, сойлын, социальн болн талдан халхар олн зүсн көдлмш бүрдәнә. Урдк җилин ноха сарас авн олн керг-үүлдвр давсмн.
Тодлхд, урдк җилин намрар СВО-д орлцачнрин өрк-бүлмүдин гешүд Аһш балһснд бәәдг Старая Сарепта музейд одв. Тер мет Карелия Республикүр төмр хаалһар поездәр зуульчлв. Шин җилин байр угтҗ, СВО-д орлцачнрин үрдин төлә һацурин нәр-наадн давулгдв, бичкн болһн әмтәхн белгән авв. Тер мет цергчнрин өрк-бүлмүдин гешүд таңһчин сойлын бүрдәцст одад, кесг концерт болн наадд өңгәр хәләв. Терүнәс нань олн зүсн марһас бүрдәһәд, дәәчнрин үрдиг эдн орлцулв.
Дәкәд келхд, комитетин элчнр Төрскән харсачин Өдрт нерәдсн митингд, Цаһан Сарин болн Масленица байрт бас орлцсн болдг. Луганск Улсин Республикин Антрацит балһснд таңһчин нертә артистнрлә хамдан Төрскән харсачин Өдрт болн хаврин байрт нерәдсн нәр-наадыг бүрдәлһнд комитет бас нилчән күргв.
Өдр болһн комитетд нег һазра дәәчнрин өөрхн улснь соньмсулҗадг сурврмудтан цәәлһвр авхар ирнә. Күн болһниг соңсад, сүв-селвгән өгәд, эднә төрмүд хаһлх арһ хәәгднә.
Онц темдглхд, шидр мана таңһчд Әрәсән «Баатрмудын цаг» төсвлә ирлцҗ «Баатрмуд-08» региональн көтлвр экләд күцәгдв. Таңһчин Толһач Хаска Батун һардврт болсн чинртә селвлцәнд Виталия Аркадьевна бас орлцад, ухан-тоолврарн хувалцв. Энүнә темдглсәр, төсвд орлцх улсин төлә сурһуль-эрдмин көтлвр бүрдәх кергтә, тер юңгад гихлә хәрҗ ирсн цергчнрт Б.Б.Городовиковин нертә Хальмг ик сурһульд сурдг онц зөв өгх кергтә. Ирлцңгү медрл авсна дару эдн йосна күцәгч бүрдәцст көдлх чадхмн гив.
Сүл өрәл җилин туршарт комитетин көдләчнр 700 һар эрлһ хәләв, 69 шаху керг-үүлдвр давулв. Цергә шишлң керг-үүлдвр давҗадг һазрур олн зүсн 30 кергсл болн һурвн миңһн килограмм хот-хол, эм болн талдан тоот йовулгдв.
Төрскән харсачин җил зарлгдснас иштә эн җилд комитетин гешүд олн керг-үүлдвр күцәхәр зуралҗана. Хөн сарин 9-д Алдр Диилврин Өдрт нерәдсн байрт ода белдвр кегдҗәнә. Зуг һоллгчнь болҗ эдн иргнмүдин төрмүд хаһллһнд шунлттаһар орлцҗана.

КАРСАНА Евгения