Бииһин төсв күцәгдҗәнә

Моһа сарин 12-т Элстд «Без границ» нертә бииһин соньн төсв күцәгдхмн. Энүнә тускар одахн «Калмыкия» РИА-н барин төвд болсн брифингин йовудт келгдв.
Төсвин һардач, Хальмг Таңһчин билг-эрдмин ачта үүлдәч Татьяна Милованован келсәр, марһан келн-улсин, өдгә цагин болн спортын девсңгүдәр давулгдхмн. Марһанд орлцхар 17-ас авн җирн нас һарсн улс эрлһән орулв. Темдглхд, орлцачнр марһанд хошадар орлцад билгән үзүлх болв.
Хальмгин сойлын ачта көдләч, «Байн Тег» бичкдүдин ансамблин һардач, марһана сурһмҗлч Эрднин Эрднь төсвд орлцачнрла хальмг би дасчана.
– Мана өвкнр сойлын байн зөөр маднд үлдәв. Хальмг бииһин айс соңсгдхла, кен-негнь дор ормдан сууҗ чадлго, босад тавшад биилдгинь цугтан эс болҗ меднү?.. Урднь бииһәр соньмсдго улсла көдлхд нанд йир соньн болҗана, – гиҗ Эрднь Саналович келв.
П.О.Чонкушовин нертә Элстин билг-эрдмин колледжиг төгсәсн баахн сурһмҗлгч Максим Девяткин марһанд орлцачнрт өдгә цагин би зааҗ өгчәнә. Энүнә келсәр, баахн болн медәтә улст хамднь өдгә цагин би дасххд амр биш болна. Зуг цуһар седклән тәвҗ, күслдән күрхәр зүткчәнә гиҗ темдглв.
– Европейск болн латиноамериканск көтлврәр төсвд орлцачнриг белдҗәнәв. Эднлә көдлхд йир соньн, кесгнь бииһин эв-арһсиг сәәнәр меднә, зәрмнь түрүн болҗ би дасад, тәәз деер билгән үзүлхмн, – гиҗ «Империя Дэнс» спортын клубин дамшач, сурһмҗлгч Оксана Кострикина ухан-тоолврарн хувалцв.
Эндр марһанд орлцачнр цаарандан белдврән давулҗана. Сурһмҗлгчнрнь болхла, би болһнднь ирлцңгү хувц олҗ өгнә.
Бииһин марһаг үзхәр седҗәдг улс Манҗин Аркадин нертә Хальмг филармоньд ирх долан хонгин үлмҗ өдрлә болх нәр-нааднд орлцҗ чадхит.

КАРСАНА Евгения