Арһлачнрин төрмүдәр күүндв

Хальмг Таңһчин Улсин Хуралын (Парламентин) Ахлач Артем Михайлов арһлачнрин зөв харслһна элч, «Деловая Россия» Цугәрәсән олна ниицәнә таңһчд үүлддг әңгин ахлач Эрднь-Һәрән Оксанала (зургт) харһв.
Харһлтд арһлачнрин төлә таңһчин закад ясруллһна, экономик делгрүллһнд туслх йосна болн арһлачнрин нөкцлтин төрмүд босхгдв. Эрднь-Һәрән Оксана «Деловая Россия» Цугәрәсән олна ниицәнә таңһчд үүлддг әңгин үүлдврин тускар келҗ өгв. Элстд намртан болх шар-шаҗна ик хургт белдлһнә йовудт бурхн-шаҗна тосхлтсин һарц барт белдҗәхин тускар эн бас келв. СоцТехин РГУ-н әңгд менеджермүдын түрүн баг сурһуль сурчана, тедниг хөөннь көдлмшт авх гиҗ арһлачнрин зөв харслһна элч темдглв. Целинн болн Приютна райодын дунд сурһульмудт бичкдүд бадминтон нааддгиг даслһна төсвин тускар бас күүндвр болв.
«Деловая Россия» Цугәрәсән олна ниицәнә таңһчд үүлддг әңгин тосхлтын комитетин көдлмшин төриг Артем Михайлов харһлтын йовудт босхад, терүнә ханьд депутат Пүрбән Олег орсна ашт таңһчин Улсин Хурал арһлачнриг дөңнлһнә туст закад батллһна төр хаһлҗана гив. Эрднь-Һәрән Оксана дарани сессьт үүлдвриннь тооцаһан өгхмн, тегәд харһлтд ямаран төрмүдт оньг тусхахиг заав. Зака үүдәгч бүрдәц бәәрн арһлачнрла сән залһлда батрулҗ хамцу кевәр үүлдҗәхәс иштә таңһчд эврә керг делгрүлҗәдг улсин төлә сән таал тогтагдҗана гиҗ парламентин Ахлач темдглв.
ДООҖАН Наталья