Баһчуд шин бүүрт нүүҗ орх

Цаһан Сарин байрин өмн өргнд Элстд 24 баахн өрк-бүлд гер-бүүрин сертификат бәрүлҗ өггдв, эн кергт 14,5 сай арслң һарһгдв. Баһчуд «Баахн өрк-бүл» гидг шаңһа көтлврт орлцад, гер-бүүрин төр хаһлхар дем авснь ик байр-бахмҗ үүдәв. Элст балһсна һардврин толһач Лиҗикә Алдр болн Элст балһсна Хургин Ахлач Максим Сорокин өрк-бүлмүдиг ончта йовдлла йөрәҗ, хөв-кишг дурдв.

Элст балһсна һардачнр баһчудыг ончта йовдлла йөрәһәд, баахн өрк-бүлмүдт дөң күрглһнд мөңг йилһҗ өглһнә төриг ЭГС-ин депутатнр нег дууһарн дөңнв гиҗ темдглв. «Җил ирвәс эн көтлврт орлцдг баһчуд дунд олн үртә өрк-бүлмүдин то өсчәхнь мана хотл балһсн делгрҗәхиг, иргчнь сән-сәәхн болхиг ил үзүлнә. Олн үртә өрк-бүлмүдиг болн цергә даалһвр күцәҗ йовх нег һазра улсиг дөңнлһн мана балһсна һардврин бәәтхә, таңһчин болн орн-нутгин һардврин эркн чинртә төр болҗана. Тана гермүд сән таалта, байрар болн бичкдүдин инәдәр дүүрч йовтха, тана өрк-бүлмүд бат болн кишгтә болтха», – гиҗ Максим Сорокин болн Лиҗикә Алдр йөрәлин үгдән келв.
Эн өдр гер-бүүрин таал ясруллһнд шаңһа дем авсн өрк-бүлмүд дунд олн үртә Леонид болн Алина Гунзиковихн билә. Эдн 2023 җилд көтлврт орлцх эрлһән орулад, удан боллго дем авснь эднд ик байрта болв. Олн үртә эк-эцк хойр балһсна һардврт ик ханлтан өргҗ, баһчудт эн көтлврт эрк биш орлцх кергтә гив. «Эн демәр гер-бүүрин таалан ясрулҗ, улм сарул патьр хулдҗ авхд эс гиҗ өгъәлҗ авсн мөңг даңцалһнд олзлҗ болхмн. Мадн һурвн үртәвидн, талдан патьр хулдҗ авхин тускар кесгәс нааран ухалҗалавидн. Бидн ода шин патьр олҗ аввидн, тегәд шаңһас йилһсн 700 миңһн арслңгиг тустаһар олзлад, гер-бүүрин таалан ясрулхвидн. Өркән өндәлһсн баһчуд кергтә иткл цаасан белдәд, иим көтлврт орлцхин туст дуудвр кеҗәнәвидн. Баахн өрк-бүлд шин бүүртә болхнь ончта болн байрта йовдл мөн», – гиҗ олн үртә эк-эцк келнә.
Гер-бүүрин төр хаһлхд шаңһа дем авсн өрк-бүлмүд дунд тавн үртә Андрей болн Данара Саранговихн эн өдр бас ик байрта бәәв. Ууһн үрнь арвн негтә, отхн үрнь хө мөстә. Эдн нег сай һар арслңга дем авв, терүг ке-сәәхн гер тосхлһнд олзлхар зуралҗана. Арслан болн Ангелина Дертеевихн эн көтлврин тускар элгн-саднас медв. Эдн җил хооран эрлһән орулсмн, тегәд иим дарунь дем өгснд алң болв. Эднә өрк-бүлд удл уга хойрдгч үрн төрхмн, тегәд шин бүүртә болхнь эднд ик байр үүдәв.
Эн көтлвр 2008 җиләс авн күцәгдҗәнә, эн җилмүдин эргцд 600 шаху өрк-бүл терүнд орлцад, гер-бүүрин төр хаһлҗ, шаңһа демәр патьр эс гиҗ гер хулдҗ авв. Сүл һурвн җилин эргцд хотл балһснд эн көтлврин йовудт 73 баахн өрк-бүл гер-бүүрин таалан ясрулв. Гер-бүүрин сертификат авсн баһчуд дунд олн үртә, цергә шишлң керг-үүлдврт орлцачнрин өрк-бүлмүд бәәснь хойр дам темдгтә болв.
Цаһан Сарин өмн өргнд иим байрта йовдл учрснь баахн өрк-бүлмүдт сән йорта болад, эднә гер-бүүрин таал ясрад, сансн санань күцҗ, сән-сәәхн бәәхд ицл өгв.

ДООҖАН Наталья