Әрәсән күүкд улсин тускар

«Медрл» ниицәнә лектормуд баһчудт орн-нутгин тууҗд ончта орман эзлсн күүкд улсин тускар келҗ өгв. Күүкд улсин нарт-делкән Өдр угтад, Элстин техническ лицейд болн Социальн технологийин Әрәсән орн-нутгин ик сурһулин таңһчд үүлддг әңгд түрүн керг-үүлдвр болв.

Харһлтд номт химик Юлия Лермонтован, антибиотик үүдәҗ һарһсн Зинаида Ермолаеван болн Тамара Балезинан, мана орн-нутгт түрүн күүкд күн министр болн нарт-делкән элч Александра Коллонтайин тускар күүндвр болв. Тер мет оютнр болн сурһульчнр Алдр Ар үзгин экспедицд авальтаһан орлцсн зөрмг Татьяна Прончищеван, Әрәсәд режиссур делгрүллһнд ик тәвцән орулсн Ольга Преображенскаян тускар медҗ авв.
Әрәсән күүкд улс эврәннь зөвән харсҗ, номин, политикин, спортын, билг-эрдмин халхд күцәмҗтәһәр үүлдҗ, ик күцәмҗ бәрснә тускар түрүн болҗ медҗ авснь йир соньн болн урмдта болв гиҗ баһчуд темдглв. Күүндврин йовудт өдгә цагт күүкд улс номин халхар үүлдҗ, ямаран күцәмҗ бәрҗ чадхин тускар бас келгдв.
«Медрл» олна ниицәнә Хальмг Таңһчд үүлддг әңгин һардач Манҗин Элеоноран келсәр, иим тууҗс баһ үйд урмд өгч, сурһулян сәәнәр сурч, өмнән күсл тәвҗ, иргчдән бас күцәмҗтә улс болхд туслна. Алдр күүкд улсин тууҗ оютнрт болн сурһульчнрт эврәннь арһ-чидлдән иткҗ, сансн санаһан күцәхд эрк биш дөң болҗ үлгүр болх.
Иим керг-үүлдврмүд Хальмг этносойлын гимназьд болн Хальмг ик сурһульд бас болхмн. Келхд, күүкд улс Әрәсән тууҗд ямаран орм эзлҗәхин тускар кен чигн келҗ лекц умшҗ чадҗана. Терүнә төлә «Медрл» ниицән мастер-лекц белдв.

ДООҖАН Наталья
ЗУРГТ: Элстин техническ лицейд болсн харһлтын кем