Күүнә зөв харсад

Шидр Әрәсән Орн-нутгин Хүүвд күүнә зөв харслһна элч Татьяна Москалькова 2024 җилд кеҗ-күцәсн көдлмшиннь тооцаһан өгв. ВКС-ин эв-арһар болсн сүүрт Хальмг Таңһчин Улсин Хуралын депутат Эрнҗәнә Петр болн таңһчд күүнә зөв харслһна элч Валерий Чуб орлцв.

Татьяна Москалькован зәңглсәр, давсн җилд әмтнәс орҗ ирсн эрлһсин то икдв. Тиигәд, нидн ут тоодан 126 миңһн эрлһн орҗ ирв, терүнәснь 64 миңһн эрлһн цергә шишлң керг-үүлдврт орлцачнрас болн теднә өрк-бүлмүдин гешүдәс ирсн билә. Әмтнә зөв харслһна элч Әрәсән Орн-нутгин Хүүвин депутатнрла нөкцҗ үүлдснд ханлтан өргҗ, эднә сурвмудт хәрү өгв. Нидн күцәсн көдлмшин аш диглҗ, орн-нутгин иргнмүдәс орҗ ирсн эрлһс дунд нурһлҗдан ямаран төрмүд заагддгин тускар эн тодрхаһар келв.

БАТАН Сәәхлә