Ик евәлтә мөргүлмүд

Бурхн Багшин Алтн сүмд һурвн хонгтан ик мөргүлмүд болхмн. Моһа сарин 12, 13 болн 14-д «Ик йөрәл» гидг нертәһәр болҗах мөргүлмүдт әмтн орлцҗ чадҗана.

Цаһан Сарин байран темдглснә дару 15 хонг болад, иим мөргүл кедг авъяс бәәсмн. Бурхн Багш әрүн ик күчән олнд медүлсн йовдлла залһлдата эн авъясин тускар кезәңк номд умшҗ болхмн. Шаҗна евәлтә ик йовдлла залһлдата номд бичгдсәр, мана Бурхн Багш мел тер кемлә шаҗна номиг хаҗһрар цәәлһҗәсн 6 сурһульчтаһан нүүрцҗ, эврә номан цәәлһҗ дөрлдснә тускар келгдҗәнә. Өдр болһн Бурхн Багш номин цәәлһвр өгәд, хаҗһр тоотынь йилһҗәсмн. Тиигәд өдр болһн тохнята цәәлһвр өгәд, Бурхн Багш эврә номин гүн болн чик учр-утхинь медүлсн болдг.
Бурхн Багшин Алтн сүмд болх мөргүлмүд заагдсн өдрмүдлә өрүн 9 часас авн 11.30 күртл болн үдин хөөн 13.00 авн 15.00 час күртл болҗахмн.
Моһа сарин 14-д цер авх саната әмтн өрүн 5 часла хурлд ирәд, нег өдрә цер авч чадҗана.
Мөргүлмүд болҗах өдрмүдлә күцәгдсн сән эс гиҗ хаҗһр үүлдврин күчнь кесг холванд икднә гиҗ тоолгдна. Цуг әмтә тоотын амулңгин төлә, шаҗна евәлтә үүлдврин төлә кегдҗәх номд багтҗ, чик седклтәһәр, иргчдән иткҗ зальврхмн.
УШКАНА Сувсн