Төрскн һазран делгрүлхәр

Эн җилин хаврар Ик Буурла района Приманыч селән 60 җилин өөнән темдглхмн. Бәәрн улс өөнд нерәдгдсн байрин керг-үүлдврмүд өргмҗтәһәр болн шуугатаһар давхин төлә эртәснь белдвр эклв. Төрскән харсгч Алдр дәәнд әмән әрвллго зөрмгән һарһсн болн цааҗла харһад ик зовлң үзсн өвкнриннь санл мөңкрүлҗ, эн селәнә делгрлтд тәвцән орулсн нег һазра улсин ач-тус хәрүлҗ, цергә шишлң керг-үүлдврт орлцачнрт онц оньган тусхаҗ өөнән темдглх зура бәәнә.
Шидр бидн Приманыч селәнд көдлмшәр одад, селәнә муниципальн бүрдәцин толһач Хулхачин Баатрла эндрк өдр-бүрин тускар күүндвидн. Баатр Геннадьевич Приманыч селәнә депутатнрин Хургин депутат болҗ һурвн хуралтд үүлдсмн. 2023 җиләс авн селәнә муниципальн бүрдәциг толһалҗана. Энд энүг цуһар сәәнәр меднә, күндлнә. Нидн селәнә улсин седвәрәр эдн «Инициативное бюджетирование» гидг шаңһа көтлврт орлцад, паркд сән кец-таал тогталһна көдлмш эклв. Таңһчин болн бәәрн хазнас йилһгдсн мөңгн деер әмтн немәд паркд өрк-бүләрн ирҗ амрхин төлә сән таал тогтав. Эдн хойр сег тосхв, йовһар йовдг хаалһс кев, тәәз углҗ тәвв. Келхд, бәәрн улс тосхлтын көдлмшт бас орлцад, дөңгән күргв.
2019 җилд селәнә муниципальн бүрдәциг толһалҗасн Манҗин Дорҗин седвәрәр паркд Төрскән харсгч Алдр дәәнд орлцсн нег һазра улст нерәдсн санлын самбр секгдсн билә. Терүнд эднә селәнәс дәәнд орлцсн цуг улсин нерд заагдв. Нидн терүнә өөр селәнәхн цааҗла харһад ик зовлң үзсн өвкнриннь санлд нерәдсн санлын бумблв углҗ тәвхәр шиидв. Келхәс, Приманыч селәнә улс төрскн һазртан эңкр болна, арвн җил хооран эдн паркин тал дунд Бодь суврһ босхв.Цөөкн җил хооран паркд бичкдүд нааддг тавлң тосхв, тегәд баахн эк-эцкнр күүкд-көвүдтәһән нааран ирхдән дурта.
- Эндр мана селәнд 380 күн бәәнә, тедн дунд далн-найн һарсн медәтнр баһ биш. Сүл җилмүдт баһчуд төрскн селәндән ирҗ малан асрх санаһан медүлҗәхнь байрта. Мана малчнр селәнә бәәдл-җирһлд шунмһаһар орлцна, олн зүсн буйнч седклин кергт дөңгән күргҗ, медәтнрт, цергә шишлң керг-үүлдврт орлцҗадг нег һазра улст болн эднә өрк-бүлмүдт оньган тусхана. Эдн мах йилһҗ өгнә, демән күргнә. Мана селәнәс 19 күн цергә даалһвр күцәҗ йовна, бидн эднд килмҗән тусхаҗ, чадсарн хот-хол, дулан хувц цуглулҗ илгәвр күргҗ өгнәвидн. Селәнә күүкд улс болн медәтнр, дунд сурһулин болн бичкдүдин садын көдләчнр дулан өөмс өлгнә, бу-селм бүркдг гөлм гүрнә. Эн күнд цагла селәнәхн арһ-чидлән негдүлҗ, цуһар тәвцән орулхар зүткнә. Нидн баахн көвүн Бембетә Очр эврә мотоциклан цергчнрт белглв. Иим төрскнч седклтә, өр-өвч болн цаһан саната улсин дөңгәр бидн эрк биш диилвр бәрхвидн, мана көвүд әмд хәрҗ ирх, - гиҗ Баатр Геннадьевич келнә.
Селәнд дунд сурһуль, бичкдүдин сад, эмнлһн, сойлын Гер бәәнә. 2021 җилд селәнд тосхгдсн бичкдүдин садт бәәрн болн хам-хоша бәәдг Баһ Буурла бичкдүд орна. Эмнлһн хуучн герт бәәршлҗәнә, тегәд энд бат ясвр кех эс гиҗ шин бәәр тосхх кергтә. Дунд сурһульд бас ясвр керглгдҗәнә. Сүл цагт мана орн-нутгт келн-улсин төсвсин медлд социальн бүрдәцс тосхгдҗахас болн ясгдҗахас иштә Приманыч селәнә сурһульд болн эмнлһнд өдгә цага таал тогтагдх гиҗ бәәрн улс ицҗәнә. Селәнә һазриг нәәмәдлҗәдг Сарпулин крайин «Владимирский» эдл-ахун һардвр селәнә сойлын Герт ясвр келһнд демән өгв.
- Җил болһн хөн сарин 2-т сән авъяст тохрсар бидн мөрнә урлда давулнавидн. Эн җил бидн эн өдрлә селәнә 60 җилин өөн темдглхәр бәәнәвидн. Келн-улсин спортар марһас, мөрнә урлдан, байрин концерт болхмн. Энд өсәд-боссн улс төрскн селәнд ирҗ байрт орлцхмн. Эн җил Алдр Диилврин 80 җилин өөн болҗана, тегәд мана ветеранмудын санл тевчхвидн, эндр цергә шишлң керг-үүлдврт орлцҗадг нег һазра улсин зургудын самбр углҗ тәвх санан бас бәәнә. Паркиг яслһна көдлмшән цааранднь күцәҗ, тәәзиг кеерүлҗ байрин концерт ирҗ хәләх улсин төлә таал тогтахвидн. Мана бичкн селән делгрәд, цецгәрәд йовхин төлә бидн арһ-чидлән хамцулҗ ниитәһәр көдлҗәнәвидн, - гиҗ Приманыч селәнә толһач Хулхачин Баатр темдглв.
БАТАН Сәәхлә
ЗУРГТ: Ик Буурла района Приманыч селәнә муниципальн бүрдәцин толһач Хулхачин Баатр нег һазра цергчд золһҗ одсн кем