Цергчнрин экнриг болн авальмудыг йөрәв

Күүкд улсин сән Өдрин өмн өргнд Хальмг Таңһчин Толһач Хаска Бату цергә шишлң керг-үүлдврт әмнәсн хаһцсн нег һазра улсин экнрлә болн авальмудла харһҗ күүндв. Хальмг Таңһчин Улсин Хуралын (Парламентин) Ахлач Артем Михайлов, таңһчин залврин Ахлачин дарук–таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Марина, «Төрскән харсачнр» шаңһа саңгин региональн әңгин һардач, таңһчин Улсин Хуралын депутат Хаалһин Очр, таңһчд күүнә зөв харсдг элч Валерий Чуб эн харһлтд орлцв. Дәкәд ода цаг зуур амрлһнд гертән бәәдг цергә шишлң керг-үүлдврт орлцҗадг медицинск эгчнр Тачин (Худила) Ангелина болн Мария Сергиенко бас эн сүүрт орлцсинь заахмн.
- Тадн һарһсн үрән болн эңкр авалян гееһәд, ик һашута болн күнд зовлң үзсн бийнь чаңһар бийән бәрәд, Төрскндән болн таңһчдан хару болнат. Бидн тана ик зовлңгиг хувалцҗ, һундл төрҗәнәвидн. Күмн әмтнә тууҗд дәәлдх цаг учрна. Найн һар җил хооран мана аавнр немшнрлә дәәлдәд, төрскн һазран хортнас сулдхсн билә. Маднла ахнр-дүүнр болдг орн-нутгт фашизм дәкнәс босхх гиҗ күн санҗасмн уга. Залу улс зөрмг кевәр дәәлдҗ, һазр деер үнн бәәдл тогтхин, иргч сән-сәәхн болхин төлә әмән өгнә. Мана цергчнрин баатр йовдлмуд олн җилин туршарт үлгүр-үзмҗ болх, бидн күн болһна неринь мөңкрүлҗ мартх зөв угавидн. Цергчнрин экнр болн авальмуд мана цага баатрмуд болна,- гиҗ Бату Сергеевич келв.
Цергә даалһвран үнн кевәр күцәһәд, зөрмгән үзүләд әмнәсн хаһцсн цергчнрин нердиг бидн мартлго эднә тускар дорас өсч йовх баһ үйд медүлх зөвтәвидн гиҗ Артем Михайлов темдглв. Эн бийнь Чечняд болсн дәәнд орлцад, хөөннь олн җилдән төрскн селәнә сурһульд багшлҗ йовсна тускар хувалцв. «Мана селәнд (Приютна района Первомайский селән) Афганистанд әмнәсн хаһцсн Манҗин Вячеславин санлд нерәдгдсн марһан бүрдәгддг билә. Хөөннь энтн района, таңһчин чинртә марһан болв, ода терүнд талдан регионмудас әмтн ирҗ, мана нег һазра көвүнә нер тодлна. Эн җил болх марһан Афганистанд, Чечняд, цергә шишлң керг-үүлдврт әмнәсн хаһцсн нег һазра улст нерәдгдх болҗ шиидвр авгдв. Бидн залу-зөрмгән һарһсн улсин санл мөңкрүлх зөвтәвидн», - гиҗ Артем Васильевич ухан-тоолвран медүлв.
СВО-д әмнәсн хаһцсн цергчнрин өрк-бүлмүдт социальн болн юридическ дөң күрглһнә төрмүдәр бас күүндвр болв. Цергчнрин экнр болн авальмуд хоорндад таньлдад, бат залһлда бәрҗ, нег-негән дөңнх болв. «Төрскән харсачнр» шаңһа саңгин региональн әңгин һардач Хаалһин Очрин келсәр, цергчнрин экнр болн авальмуд буйнч седклин кергүдт шунмһаһар орлцҗ, даалһвран күцәҗ йовх улсиг дөңнхәр шунна. Залу улсла зерглҗ цергә даалһвр күцәҗ йовх медицинск эгчнр Тачин (Худила) Ангелина болн Мария Сергиенко бооца батлад, СВО-д орлцҗана. Эдн шав авсн кесг цергчнрт дөңгән күргҗ, бас зөрмгән үзүлҗ йовна, тегәд эднә үүлдвр олнд ик бахмҗ болҗана гиҗ харһлтд орлцачнр темдгләд, күүкд улст ханлтан өргв.
Харһлтын чилгчәр Хальмг Таңһчин Толһач Хаска Бату күүкд улст цецгүд болн белгүд бәрүлҗ өгәд, сән өдрин байрла йөрәв.
ДООҖАН Наталья