Усна нәрн төр хаһлгдҗана

Урҗ өдр Элстин һардврин толһач Лиҗикә Алдр Элст балһсна Хургин депутатнрла хамдан Деед Яшкуль-Элст усна сурвлҗна тосхлтын йовудыг бүрткҗ хәләв.

Өдгә цагт сольгдх зөвтә 17200 метр усна турваһас 16900 метр турвас белн бәәнә, эннь көдлмшин ик зууһинь тогтав. Сольврин көдлмшиг «Мастер-Юг» ООО күцәҗәнә. Бүрдәцин ах инженер Алексей Пакин келсәр, моһа сарин чилгчәр эдн көдлмшән дуусхар зуралҗана. Үлдсн 300 метр турвасиг углҗ тәвхин төлә цуг материалмуд бәәнә гив.
Мөрн сард болхла ар үзгин болн Деед Яшкулин усна савмудла негдүләд шин турвасар цевр усн өггдхмн. Хөн сарин 9-д Элстд цевр усн ирхмн, гиҗ «Мастер-Юг» бүрдәцин элчнр иткүлв.
Тер өдр балһсна йосна элчнр Элстин Ипподромная уульнцд күцәгдҗәдг көдлмшиг бас бүрткв. Тенд «Газводстрой» бүрдәцин мергҗлтнр көдлҗәнә. Энүнә һардач Картин Санана темдглсәр, көдлмш цаг-болзгтан күцәгдҗәнә. Көдлмш 65 процентд күцәгдсн бәәнә. Эндр 2300 метр усна турвас углҗ тәвгдв, ут тоодан утдан 5760 метр турвас сольгдхмн. Урднь балһсна Чограйская, Теңгрин Уйдл болн Алтн Булг нертә уульнцст ирлцңгү көдлмш күцәгдв. Терүнәс нань өдгә цагт түүмр унтраһачнрин төлә төмр худгуд углҗ тәвгдҗәнә.
– Балһснд тиим көдлмш күцәхд амр биш, тер юңгад гихлә турвас сольгдҗадг ормст олн бүрдәцсин турвас харһна, тер төләд олн цергллтслә үгцх кергтә болна, – гиҗ Картин Санан темдглв.
Цуг эн көдлмш Хальмг Таңһчин Толһач Хаска Батун даалһврар күцәгдҗәнә. Сүл җилмүдт Элстд усна төр нәрн болҗ, әмтиг үүмүлҗәнә.
– Чинртә көдлмш төгсхдән өөрдҗ йовхнь мадниг байрлулҗана. Нидн зуни кемд элстихн кесг өдрин туршарт усн угаһар зовҗав. Эн җилин зуни бәәдл оңдан болх гиҗ итклтә бәәнәвидн, – гиҗ ЭГС-ин ахлач Максим Сорокин келв.
–Долан хонг хооран усна турвас дәкнәс эвдрәд, усн уга үлдсн балһсна улс зовад бәәсмн. Тиигхд, «Элиставодоканал» МУП-ин көдләчнрт турвасиг сольҗадг бүрдәцсин улс нөкд болв, теднд ик ханлтан өргҗәнәвидн. Ирлцңгү көдлмш Элст балһсна һардврин онц бүртклһнд бәәнә. Теңгрин бәәдл чигн туслҗана, тегәд зуралгдсн цуг тоот цаг-болзгтан күцәгдх зөвтә, – гиҗ Лиҗикә Алдр товчлв.
КАРСАНА Евгения