Депутатнрин нөкцлт батрх

Шидр Хальмг Таңһчин Улсин Хуралын (Парламентин) болн Элст балһсна Хургин депутатнр харһад, нөкцҗ үүлдхин тускар күүндв. Хотл балһсна әмтиг үүмүлҗәдг төрмүдиг хамдан хаһлҗ, хамцу үүлдх кергтә гиҗ депутатнр шиидв.

Таңһчин Улсин Хуралын (Парламентин) Ахлач Артем Михайлов, энүнә дарук Бадмин Вячеслав, Элст балһсна Хургин Ахлач Максим Сорокин болн зәрм депутатнр эн харһлтд орлцҗ, бәәрн улсиг үүмүлҗәдг төрмүдәр күүндв.
- Эндр мана харһлт шаңһа йосна болн депутатнрин хоорндк хәрлцә батрулхин төлә бүрдәгдв. Хотл балһсна әмтн депутатнрла болдг харһлтст босхдг төрмүдиг хаһлхин төлә нөкцҗ үүлдҗ, арһ-чидлән негдүлх зөвтәвидн. Мана нөкцлт олн әмтнд туста болхнь лавта, - гиҗ Артем Васильевич темдглв.
Таңһчин Улсин Хуралын болн ЭГС-ин депутатнр нег суңһврин участкд үүлднә, тегәд эдн әдл төрмүд хаһлх зөвтә болна. Харһлтд орлцачнр суңһачнриг үүмүлҗәдг төрмүдиг дигләд, хамцу үүлдврин зура батлх болв. Әмтнә төрмүд хаһллһнд таңһчин күцәгч йосна бүрдәцс болн Элст балһсна һардвр хамцу көдлмшт бас орлцхмн.
ДООҖАН Наталья