Икр күүкд болн көвүд һарв

Өрк-бүл болһнд үрн һархла ик байрта йовдл болдгнь мөн. Икр үрд һарснь хойр дам байрта болдг. Күүкд улсин нарт-делкән Өдрлә күүкд һарснь бас ончта болна.
О.Шунгаеван нертә нилхд төрлһнә төвин зәңглсәр, күүкд улсин сән өдрлә Софья болн Владимир Сангаджиевихнә өрк-бүлд икр күүкд һарв. Тегәд эднә ууһн көвүн Дарсен хойр дү күүктә болсндан ик байрта бәәнә. Баахн өрк-бүл олн үртә болв. Келхд, Владимирин ээҗнь бас моһа сарин 8-д һарсмн. Нилхд төрлһнә төвин эмчнр Уташа Гилән, Ольцан Баира, Арсена Евгения, Логан Баира, Бадмин Байр болн Босхан Татьяна, месллһнә эгч Дорҗин Альма болн акушерк Чимдә Екатерина күүкд күүнд цаһан төр болхд дөңгән күргв. Олн үртә эк болн икр күүкд төвин көдләчнрин килмҗтә хәләврт дарунь батрад, герүрн хәрв.
Хальмг Таңһчин эрүл-менд харлһна министрин үүл дааҗадг Саран Булат күүкд улсин сән өдрлә нилхд төрлһнә төвд ирәд, эн өдр герүрн хәрҗәсн Нимгировихнә болн Доржиевихнә өрк-бүлмүдиг йөрәв. Нимгировихнә өрк-бүлд икр көвүд һарв, эдн дәкәд хойр көвүтә. Дорджиевихн ода һурвн күүктә болн хойр көвүтә өнр-өсклң өрк-бүл болв.
«Сүл җилмүдт мана таңһчд олн үртә өрк-бүлмүдин то өсәд йовна. 2024 җилд таңһчд олн үртә 8475 өрк-бүл тоод авгдв. Нидн мана таңһчд һарсн нилх болһн өрк-бүлдән һурвдгч болн дарук үрн болна», - гиҗ Булат Амангельдыевич темдглв. Дааврта һардач эк-эцкнриг байрта йовдлла йөрәһәд, нилхдин кинь акҗ, эрүл-менд болн өлзәтә сән үрд болҗ өсхиг дурдв. Һарсн нилх болһнд Хальмг Таңһчин Толһачин белг бәрүлҗ өггдв.
ДООҖАН Наталья
ЗУРГТ: икр көвүд һарсн Нимгировихнә
өрк-бүлиг йөрәҗәх кем