Гүлгн гемиг эртәснь илдкхәр

Әрәсән Орн-нутгин Хүүвин эрүл-менд харлһна комитетин ахлачин негдгч дарук, «Негдсн Әрәсә» партин «Эрүл-менд иргч» төсвин региональн зүүцүләч Башанкан Бадмин седвәрәр эн өдрүмдт мана таңһчд чинртә керг-үүлдврмүд болв.
Әрәсән эрүл-менд харлһна министерствин Н.Блохинан нертә гүлгн гемәс хөрлһнә номин-медицинск шинҗллтин төвин мергҗлтнр Элстд гемтә улсиг хәләһәд, эмнлһнә туст сүв-севлгән өгв.
Башанкан Бадм Н.Блохина нертә төвин мергҗлтнрлә хамдан таңһчин гүлгн-гемәс хөрлһнә диспансерт гемтә улсла харһад, эднд эмнлһнә туст селвг өгч күн болһнла күүндв. Хойр өдрин туршарт эмчнр 200 һар кү хәләв. Толһан, күзүнә, кииһин болн геснә мөчмүдин гүлгн гемтә улс орн-нутгин нүүрлгч төвин мергҗлтнрлә харһад, гүн шинҗллт, өдгә цага эв-арһс олзлҗ эмнлһ келһнә туст селвг авв. Орн-нутгин төвин һардачин дарук Александр Петровский регионмудт үүлддг эмнлһслә нөкцлт батрулҗ бат залһлда бәрҗ үүлдх кергтәг темдглв. «Бидн таңһчин гүлгн-гемәс хөрлһнә диспансерин эмчнрлә хамдан гемтә улст дөң болхин төлә дамшлтарн хувалцҗ, мана төвд эмнлһнә туст ямаран өдгә цага эв-арһс олзлгддгин тускар медүлх күслтәһәр ирвидн», – гиҗ гиич келв. Блохинан нертә төвин мергҗлтнр мана эмчнр кергән сәәнәр меддгиг темдгләд, эн керг-үүлдвр давулхд дөңгән күргснд диспансерин һардврт ханлтан өргв. Башанкан Бадм бийнь 30 шаху күүнлә харһад, эмнлһнә тускар күүндв.
- Блохинан нертә гүлгн гемәс хөрлһнә номин-медицинск шинҗллтин төв болн мана таңһчин эмчнр дунд батлгдсн нөкцлт олн җилин туршарт делгрҗәнә. Арвн һар җил хооран төвин мергҗлтнр мана таңһчур түрүн болҗ ирв, тер цагас нааран сән залһлдан батрв. Эн җилмүдин эргцд кесг мана эмчнр гүлгн гемәс хөрлһнә нүүрлгч төвд сурһуль сурад, мергҗлтән өөдлүлв. Эндр эдн хоршасн медрлән болн дамшлтан олзлад, бәәрн улст дөңгән күргҗәнә. Иим керг-үүлдврмүд регионмудын эмнлһсиг дөңнлһнә, әмтнд күргҗәх медицинск дөңгин чинриг өөдлүллһнә көтлврин медлд давулгдна. Мана таңһчин әмтн орн-нутгин нүүрлгч төвин мергҗлтнрин сүв-селвг авч, гертән сән эмнлһ авч чадхнь йир сән, – гиҗ Бадм Николаевич келв.
Урҗ өдр болсн селвлцәнд ЮФО-н болн СКФО-н эмнлһс эрк биш медицинск даатхлһна саңгас йилһгддг мөңгиг олзта-тустаһар олзллһна, эм, кергсл болн нань чигн тоот хулдҗ авлһна туст орн-нутгин закад күцәлһнә төрт нерәдгдв. Сүүриг Орн-нутгин Хүүвин депутат Башанкан Бадм секв. Селвлцәнд Әрәсән ФОМС-ин, ФАС-ин, Росздравнадзорин, прокуратурин, Әрәсән Өмн үзгин болн Ар Кавказин регионмудын эрүл-менд харлһна министерствсин болн эмнлһсин элчнр орлцв. Селвлцәнд эмнлһс эрк биш медицинск даатхлһна саңгас йилһгддг мөңгиг тустаһар олзллһна туст күцәгдсн бүртклһнә керг-үүлдврмүдин ашин, илдкгдсн дуту-дундсиг уга келһнә тускар келгдв.
Өцклдүр болсн селвлцәнд «Гүлгн гемәс хөрлһн» гидг орн-нутгин төсвин керг-үүлдврмүд хәләгдв. Сүүрт Әрәсән эрүл-менд харлһна министрин дарук Евгений Камкин, Н.Блохинан нертә төвин һардачин дарукс Тигран Геворкян болн Александр Петровский, гематологин номин-медицинск төвин һардач Елена Паровичникова орлцв. Хальмг Таңһчин эмчнрлә хамдан ЮФО-н болн СКФО-н элчнр терүнд орлцад, гүлгн-гемәс хөрлһнә, гемтә улст дөң күрглһнә туст ухан-тоолврарн хувалцснь туста болв.
Әрәсән Орн-нутгин Хүүвин эрүл-менд харлһна комитетин ахлачин негдгч дарук Башанкан Бадмин седвәрәр бүрдәгдсн ик чинртә керг-үүлдврмүд мана таңһчин бәәтхә, хам-хоша бәәдг регионмудын эмчнрин төлә туста болснь маһд уга. Мана таңһчин әмтн болхла гертән Әрәсән нүүрлгч эмнлһнә мергҗлтнрлә харһад, сүв-севлг авснь бас темдгтә.

Батан Сәәхлә