«Дәәч» төвин дәкәд нег әңг секгдв

Хойр җил хооран мана таңһчд баһчудын цергә-спортивн белдврин болн төрскнч сурһмҗин «Дәәч» төв үүлдврән эклв. Төрскән харсачин җилд нерәдәд, Хальмг Таңһчин Толһач Хаска Батун седвәрәр болн даалһврар хотл балһсна болн райодын дунд сурһульмудын улд «Дәәч» төвин әңгүд секгдҗәнә. Шидр тиим әңг Элст балһсна 4-ч тойгта дундын сурһульд секгдв.
ЮФО-д Әрәсән Президентин күцц зөвтә элчин дарук Владимир Гурба болн Хальмг Таңһчин Толһач Хаска Бату эн әңгин ханьд орсн сурһульчнриг йөрәхәр ирв. Байрин керг-үүлдврт «Дәәч» төвин һардач, Хальмг Таңһчин Улсин Хуралын (Парламентин) депутат Җаңһан Чимд болн әңгин үүлдвриг залх инстркутор, цергә шишлң керг-үүлдврин ветеран Нахошкина Мингиян, багшнр болн эк-эцкнр орлцв.
- Тадн ик дааврта шиидвр авснд би бахмҗ кеҗәнәв. Хотл балһсна 4-ч тойгта дунд сурһульд эндрәс авн «Дәәч» төвин әңг үүлдхмн. Ода тадн ик болн бат өрк-бүлин ханьд орҗанат. Олн җилин туршарт тадн нег-негән дөңнҗ, итклтә сән үүрмүд болҗ, нег-негнәннь күцәмҗд байрлҗ, ээм-ээмән түшҗ хамдан йовхит. Тадн Төрскән харслһнд бийән нерәдсн баатриг шүүҗ авч, терүнә нер зүүхт. Эн әңг бүрдәлһнә седвәр татсн улст, терүг дөңнсн сурһулин багшнрт ик ханлтан өргҗәнәв. Төрскндән итктн, сурһулян сәәнәр суртн, таңһчиннь делгрлтд тәвцән орулхар зүтктн. Бидн хамдан чидлтә, арһта болнавидн, – гиҗ Бату Сергеевич бичкдүдиг йөрәҗ келв.
«Дәәч» төвин әңгин ханьд орсн бичкдүдт күцәмҗ дурдад, ЮФО-д Әрәсән Президентин күцц зөвтә элчин дарук Владимир Гурба мана орн-нутгин тууҗиг үнн кевәр хадһлх кергтәг темдглв. 80 һар җил хооран мана аавнр немшнрлә ноолдсмн, эндр цергә шишлң керг-үүлдврт орлцачнр фашизмәс нарт-делкәг харсҗана. Төрскән харсгч Алдр дәәнд олн келн-улсин элчнр хамдан хортыг уга кеҗ йовсмн, цуһар Диилврт тәвцән орулв. Мана өвкнрин зөрмгин тууҗиг медх кергтә гиҗ Владимир Николаевич темдглв.
«Дәәч» төвин һардач Җаңһан Чимдин темдглсәр, иим әңгүд мана орн-нутгт түрүн болҗ мана таңһчд секгдв. Ода мана таңһчд 15 сурһульд иим әңгүд бүрдәгдв. Приютна районд хойр, Целинн района Вознесеновка селәнә сурһульд нег әңг бүрдәгдв, наадкснь Элст балһсна сурһулин бүрдәцст үүлдҗәнә. «Дәәч» төвд көдлдг 20 инструкторас 18 күн цергә керг-үүлдврмүдин ветернамуд болна, СВО-д орлцсн 12 цергч 26 шаңһа ачлврар ачлгдсмн. Бичкдүд цергә болн спортивн белдвр кесн деерән төрскнч сурһмҗин керг-үүлдврмүдт орлцхмн, түрүн дөң күрглһнә дамшлт хоршахмн.
Сурһульчнрла болсн харһлтын хөөн ЮФО-д Әрәсән Президентин күцц зөвтә элчин дарук Владимир Гурба болн Хальмг Таңһчин Толһач Хаска Бату «Дәәч» төвд одв.

ДООҖАН Наталья