Баатрмудын зургуд

Хальмг Таңһчин Целинн районд санлын эрс секгдв. Төрскән харсгч Алдр дәәнд бәрсн Диилврин 80 җилин өөнд нерәдәд, эн керг-үүлдвр күцәгдв. «Санлын эрсиг» района һардврин сойлын әңгин көдләчнр белдҗ, олна оньгт тусхав.
Алдр дәәнә җилмүдт Төрскән харсч дәәлдсн цергчнрин, офицермүдин, эмчнрин, медицинск нань чигн көдләчнрин, дәәнд залусла нег зергләнд Диилвриг өөрдхҗ дәәлдҗ йовсн күүкд улсин зургуд тәвгдсн бәәнә. Дәәнә тууҗ өрк-бүл болһна тууҗла залһлдатаг эн эрсин зургуд медүлҗәнә. Орн-нутгин цуг улсин җирһлд догшн шүүвр болсн цаг келн улсиг хамцулсинь, ниитә орн-нутгиг кен чигн диилҗ чадшгог медүлҗәнә. Баһчудт эннь өвкнрин зөргтә үүлдврин, Төрскндән итклтә боллһна үлгүр болҗана.
«Санлын эрс» Троицкое селәнә сойлын Герт тәвгдсн бәәнә. Дәәнә цагиг тодлулсн деерән эрст тәвгдсн зургуд әмтнд хөвтә амулң җирһл делдсн баатрмудын санлыг күндллһнә темдг болҗана. Чинртә эрст тәвгдҗәх зургудын болн материалмудын то тасрҗахш. Целинн района әмтн тиигәд дәәнд орлцсн баатрмудын нериг сергәһәд, эврә һазрин улсин туурмҗта тууҗинь тогтаҗана.
ХӨӨЧИН Галина