Арвн негдгч Крымск хавран тосад…

Моһа сарин 18 – Әрәсән тууҗд шин йовдлар ончрв. Арвн негн җил хооран эн өдрлә Крым Республикин болн Севастополь балһсна иргнмүд референдумин ашар Әрәсән ханьд орхар шиидв. Эн җилмүдин туршарт Крым болн Севастополь шишлң көтлврин йовудт делгрәд йовна, гиҗ темдглх кергтә.

Арвн негн җил нег агчм мет давснь болҗ медгднә. Эн цагин эргцд шин регионмудт чинртә хүврлтс болв. Әрәсән ханьд орснас авн тенд экономик шин делгрлтән авв, кесг талдан социальн халхс бас ясрв. Тер мет олн-әмтиг негдүлҗәдг Крымск тагт, «Таврида» хаалһ, шин аэропорт тосхгдв. Терүнәс нань дунд сурһульмудт, бичкдүдин садмудт бат ясвр күцәгдҗ, тер һазра дорас өсч йовх үйнр сән кец-таалта бүрдәцст сурдг арһта болв. Эрүл-менд харлһна, сойлын, зуульчллһна болн нань чигн халхсар хүврлтс күцәгдсинь ил үзҗ болна.
2014 җилин моһа сарин 16-д Крымин бәәрн улс референдумд орлцад, теднәс ик зунь Әрәсән орн-нутгин ханьд орхар дуран медүлв. Моһа сарин 18-д болхла мана орн-нутгин Президент Владимир Путин Крым Республикиг болн Севастополь балһсиг Әрәсән ханьд орулҗадг шишлң бәрмт цаас һарһв. Эн йовдл тууҗлгч чинртә болв.
Эндр Крым Республик болн Севастополь балһсн цаарандан делгрҗәнә. Севастопольд Әрәсән Хар теңгсин флотын цергә-теңгсин улнь болна. Әрәсән цуг регионмудла әдләр олн санкцсла харһулсн бийнь Крымин улс олна Диилврин төлә цергә шишлң керг-үүлдврин орлцачнрт буйнч седкләрн чадсарн дөңгән илгәнә.
Эн тууҗлгч йовдл орс келн-улсин заңгиг хүврәҗ болшго гисиг цуг делкәд медүлсн болдг. Өдгә цагт болхла Крымин бәәрн улс олна эвин төлә төрскн нутган бас харсҗ йовна. Келхәс, Әрәсән орн-нутгла ханьцад, Крымин иргнмүд әәмшг угаһар бәәдг арһта болв.
Эндр Әрәсән регионмудт, нег үлү мана таңһчд Крымск хаврин арвн негдгч җилд нерәдсн байрин керг-үүлдврмүд давулгдхмн. Элст балһсна Диилврин паркд нег һазра мана улс олар ирҗ терүнд орлцҗ чадхмн. Таңһчин баһчудын болн олна бүрдәцст орлцачнр ирлцңгү керг-үүлдвр давулхмн.
ОЛЬДАН Цаһан