Нег һазра улсиг дөңнәд

Давсн долан хонгт Әрәсән Орн-нутгин Хүүвин депутат, «Негдсн Әрәсә» партин «Эрүл-менд иргч» төсвин региональн зүүцүләч Башанкан Бадмин седвәрәр мана таңһчд Әрәсән эрүл-менд харлһна Н.Блохинә нертә гүлгн гемәс хөрлһнә номин-медицинск шинҗллтин төвин мергҗлтнр ирҗ бәәрн улсин эрүл-менд шинҗлҗ, эмнлһнә туст селвгән өгв.

Бадм Николаевич бийнь орн-нутгин эмнлһнә мергҗлтнрлә хамдан бас әмтнлә харһв. Эмчд бийән үзүлхәр ирсн зәрм улст хирург-онкопроктологин дөң керглгдҗәсмн, тегәд Бадм Николаевич дөрвн күүнд месллһ кех болв. Таңһчин эмчнр месллһ келһнд орлцҗ, терүнә йовудт дамшлт хоршахмн. Келхд, Бадм Николаевич эмч болҗ эмнлһнә туст сүв-селвг өгсн деерән депутат болад, немр шинҗллт келһнд, Москва балһсна клиникд одад мергҗлтнрлә харһхин туст ямаран иткл цаас белдхин туст дөңгән күргх болв. Эмчнрлә харһхар ирсн улс дунд Башанкан Бадм эднд месллһ кесн әмтн ирснь энүнд байрта болв. Тиигәд, нег медәт нәәмн җил хооран месллһ кесмн, эндр эн эрүл-менд бәәнә. Дәкәд нег залу күн Элстд болн Москвад кесг месллһ кеһәд, ода эдгҗәнә. Зәрмснь Бадм Николаевичиг бичкнәснь авн медҗ йовна, тегәд иим улсла харһлтс ик байр үүдәсн деерән ик дааврта болв гиҗ эн темдглв.
Башанкан Бадмин седвәрәр орн-нутгин бүрдәцсин, ЮФО-н болн Ар Кавказин регионмудын эмнлһсин орлцатаһар чинртә төрмүдәр селвлцән болн номин-шинҗллтин хург болв. Тер мет Блохинә нертә төвин мергҗлтнр таңһчин залврин Ахлачин дарукин–таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Маринала болн таңһчин эрүл-менд харлһна министрин үүл дааҗадг Саран Булатла харһв. Эдн орн-нутгин эмнлһсин эмчнр нааран ирҗ бәәрн улст дөң күрглһнә, таңһчин эмчнрин мергҗллт өөдлүллһнә төрмүдәр күүндв. Харһлтд Э.Тимошкаеван нертә гүлгн гемәс хөрлһнә таңһчин диспансерин ах эмч Муутла Земфира болн энүнә дарук Босхмҗин Мира орлцв.
Әмтн дарунь эрүл-мендин бәәдлән шинҗлҗ цаглань эмнлһ авлһна төр харһлтд босхгдв. Блохинә нертә төвин мергҗлтнрин келсәр, Хальмг Таңһчд гүлгн гемтә улст дөң күрглһн өөдән кемҗәнд бүрдәгдсн бәәнә. Эн әәмшгтә гемәр гемтсн улсиг эмәр теткнә, эдн дарунь эмнлһ авна. Гүлгн гемтә улс ямр нег талдан эмнлһнд одсн цагт эднә шинҗллтсин ашиг эмчнр дарунь авч чадхин туст бәәдлиг ясрулх кергтә гиҗ мергҗлтнр темдглв. Дәкәд эн гемиг эртәр илдкҗ авлһна, терүнәс саглуллһна керг-үүлдврмүдиг шунмһадулх кергтә гиҗ харһлтд келгдв. Блохинә нертә төвин һардачин дарук Александр Петровскийин келсәр, таңһчд көдлдг гүлгн гемин эмч болһн дару-дарунь мергҗлтән өөдлүлх зөвтә.
Орн-нутгин нүүрлгч төвин мергҗлтнр мана таңһчур ирснь бәәрн улст Москва балһс орлго гертән эмнлһнә туст селвг авх арһ өгнә. Тер мет таңһчин эмчнр мергҗлтән өөдлүлҗ, эмнлһнд олзлгддг өдгә цага эв-арһсин тускар медҗ авна гиҗ Бадм Николаевич темдглв.
Башанкан Бадмин зәңглсәр, зунар мана таңһчур Әрәсән ФМБА-н мерҗглтнр ирхмн гиҗ зуралгдҗана. Эдн һурвн җилин эргцд депутатын үрврәр мана таңһчур ирәд, бичкдүдин эрүл-менд шинҗлҗ, эмнлһнә туст сүв-севлг өгч, гүн шинҗллт болн эмнлһн кергтә күүкд-көвүдиг шүүҗ авч, Москвад месллһ кенә. Депутатын седвәрәр орн-нутгин нүүрлгч эмнлһсин мергҗлтнр мана таңһчур ирҗ бәәрн улст дөң күргдгнь бичкдүдт болн медәтнрт хол хаалһд йовлго гертән эмнлһ авхд тааста болна.
ДООҖАН Наталья
ЗУРГТ: таңһчин залврт болсн харһлтд орлцачнр