Ик хургт белдәд

Шидр Хальмг Таңһчин залврин Ахлачин дарукин үүл дааҗадг Цернә Эрднь Москва балһснд Әрәсән сойлын министрин дарук Андрей Малышевла харһв. Терүнд намртан мана таңһчд болх бурхн-шаҗна III ик хургт белдвр келһнә төр хәләгдв.
Харһлтд ик хургин медлд болх керг-үүлдврмүдин төрәр өргн күүндвр болв. Тиигәд, Энткгин Келн-улсин музейин бурхн-шаҗна хуучн цага әрүн тоотын һәәхүл болхмн гиҗ зуралгдҗана. Һәәхүлд орлцачнр 1898 җилд Бихарт олгдсн Бурхн Багшин дурсхлмуд үзҗ чадхмн. Келхд, тенд Капилавасту гидг хуучн балһсн билә гиҗ тоолгдна. Әрәсән Бурхн шаҗна сүзгтнрин төв заллтын ахлач Йонтен гелң Дели орсн цагтан эн һәәхүл бүрдәлһнә тускар үгцв. Хальмгин әмтн бәәтхә, ик хургт орлцхар ирх гиичнр әрүн чинртә тоот үзҗ буйн хоршаҗ чадхмн.
Цернә Эрднин темдглсәр, эн һәәхүл Әрәсә болн Энткг хоорнд сойлын болн шар-шаҗна залһлда батрулхд туслхмн. Харһлтд Әрәсән сүзгтнрин төв заллтын ахлач Йонтен гелң болн Хальмг Таңһчин сойлын болн зуульчллһна министрин үүл дааҗадг Түрвән Саглр орлцв.