Һазриг тустаһар олзлх кергтә

Давсн долан хонгт Федерацин Хүүвд болсн сүүрт орн-нутгин төлә ик чинр зүүҗәдг төрмүд хәләгдв. Хальмг Таңһчин элч Хачира Борис һазриг тустаһар болн олзтаһар олзллһна төр босхв.

Хальмг Таңһч 7 сай гектар аһу һазр эзлнә, терүнәснь 92 процентнь селәнә эдл-ахуд олзлгдна. Таңһчин хойрдгч иргн болһн селәнә эдл- ахуд көдлнә. Мана таңһч Әрәсәд мал асрлһна халхд нүүрт йовна, энд орн-нутгт бәәдг хальмг тохма малын 30 процентнь болн хөөдин 10 процентнь бәәнә. Орн-нутгин эдл-уушин әәмшг уга бәәәлһнә болн малд хот белдлһнә төр ик чинр зүүҗәнә, гиҗ Хачира Борис темдглв.
- Ода бәәдг малд кергтә хотын кемҗәнәс 75 процентнь күртчәхш. Тернь учрта, Әрәсән өмн үзгт болн Көк теңгсин барун үзгт хур-чиг уга болад, царцахан то икдәд, һаң халун болад һазр көдәрв. 2020 җил күртл шора-тоосн тавн җилд нег дәкҗ учрдг бәәсн болхла, сүл дөрвн җил дарандан ик салькн болн шора учрҗахиг спутникас кесн зургуд медүлв. Ростовск мүҗ, Хар теңгсин райодт шора учрна, болв хамгин икәр Хальмг Таңһч терүнәс иштә ик зовлң үзнә. Тер учрар һазр көдәрҗәнә. Тегәд малд хот белдхин төлә услврин участкуд делгрүлх кергтә, – гиҗ Хачира Борис темдглв.
Чинртә төр босхад, таңһчин элч Федерацин Хүүвин Ахлач Валентина Матвиенкод ханлтан өргәд, Хальмгин төрмүдт ик оньг тусхаҗ, усар тетклһнә 5 шаңһа бүрдәциг хадһллһнд туслсиг темдглв.