Балһсн кеерүлгдҗәнә

Шидр «Калмыкия» РИА-н барин төвд Элст балһсна һардврин орлцлһтаһар чинртә күүндвр болв. Терүнд балһсна уульнцст күцәгдҗәдг ясврин болн талдан көдлмшин тускар келгдв.

– Намртан мана таңһчд шар шаҗна нарт-делкән III ик хург болхмн. Эн керг-үүлдврт ик белдврин көдлмш күцәгдҗәнә. Тер мет Элст балһснд сән кец-таал тогталһна көдлмш сән йовудтаһар давҗана. Кех-күцәх тоот дала бәәнә, тегәд ирлцңгү зура тогтагдад көдлмш күцәгдҗәнә, – гиҗ Элст балһсна һардврин толһач Лиҗикә Алдр күүндвриг эклв.
Балһсна архитектурн бәәдлин тускар Элстин һардврин толһачин дарук Хаска Сергей келҗ өгв. Энүнә үгәр, өдгә цагт «Родина» сойлын төвин ясвр цаарандан күцәгдҗәнә. Герин ора деер углгдсн көдлмшч һартан хальмг цәәтә ааһ бәрхмн гиҗ медәтнрин селвгәр батлгдв. Тер мет Хальмг филармоня шидрк талвңд бас сән таал тогтагдхмн. Хальмгин Баатр Манҗин Аркадьд нерәдсн бумблв секхәр зуралгдҗана. «Иньгллт» паркд болн Долан хонгин күрән өөр бас ирлцңгү көдлмш кегдхмн. Кичгә Төлән нертә Хальмг келн-улсин гимназин ах классмудын бәәрнд бат ясвр эклв. Тенд амрлһна өдрмүдт шар шаҗна сурһалин медрл өггдхмн. Элстин төвәс экләд, цааранднь балһсна талдан уульнцст болн микрорайодт сән кец-таал тогтагдад бәәхмн, гиҗ Сергей Андреевич иткүлв.
Элстин хаалһс яслһна болн ЖКХ-н төрмүдин тускар Кальдинә Борис цәәлһв. Эн җилд балһсна Горькийин, Кировин, Сусеевин, Илюмжиновин, Чайкинан, Толстойин нертә уульнцст болн Анацкийин проспектд хаалһс ясгдхмн. Тер мет тенд светоформуд бас углҗ тәвгдхмн. Терүнәс нань Чограйская уульнцд болн дәәнә ветеранмудын шин госпиталь күртл хаалһс тосхгдхмн.
Келхд, Элстин кесг бүрдәцсин өөр көлгән зогсадг шишлң ормс уга, эн учрас балһсна поликлиникин, кесг сурһульмудын, негдгч микрорайонд бәәдг МФЦ-н болн талдан бүрдәцсин өөр тиим ормс бүрдәгдх болв. Өөрхн иргчд болхла Элстд хальмг келн-улсин кев-янзта 90 шаху зогсал тосхгдх болв.
Темдглхд, усна нәрн төрәр Кальдинә Борис бас келв. Олн-әмтиг үүмүлҗәдг төр хаһлгдҗана. Деед Яшкуль-Элст болн 1-ч тойгта усна сурвлҗна турвас сольгдҗана. Сәәхн Теңгр, Цаһан Унгн, Хочиновин, Изотовин, Чернышевскийин, 28-ч Әәрмин нертә уульнцст усна турвасин ясврт мөңг йилһхәр бас зуралгдҗана.
2025 җилин Элст балһсна хазна тускар Шуурһчин Церн зәңглв. Эврә олз-орун 2,5 җува арслң болн немр 3,8 җува арслң энүг тогтана. Үлгүрлхд, эн мөңгнәс 359 сай арслң ЖКХ-н халхд, 470 сай арслң хаалһсин ясврт, 27 сай арслң «Родина» сойлын төвин ясврт һарһгдхмн. Тер мет балһсна хазнд дәкәд немр мөңгн орулгдхнь күләгдҗәнә. Терүнәснь 10 сай арслң балһсна зогсалмуд шинрүллһнд, 250 сай арслң болхла талдан кец-таал тогталһнд һарһгдх зөвтә, гиҗ Церн Санджеевич ашлв.

БАДМИН Занда