Цогц-махмудан батрулна

Эн өдрмүдт мана таңһчд «Эрүл-менд бәәтн» гидг керг-үүлдвр төгсхдән өөрдҗ йовна. Эн керг-үүлдврин медлд эрүл-менд харлһна көдләчнрин багмуд таңһчин селәдәр йовҗ, бәәрн улсин эрүл-менд шинҗлв. Терүнә медлд ямр нег гем илдкгдсн болхла әмтн гүн шинҗллт кеҗ, эмнлһ авч, эрүл-мендин бәәдлән батрулхмн.

Целинн района Троицкое селәнд Элст балһсна поликлиникин әңг үүлднә. Эн эмнлһнд өдгә цага сән таал тогтагдв, сән кергсл углҗ тәвгдв, тегәд цогц-махмудан батрулҗ болна.Физиотерапевтическ әңгд байн дамшлтта эмч Лиҗин Валерий көдлнә. Келхд, Валерий Церенович 1981 җиләс авн таңһчин эрүл-менд харлһна халхд көдлҗ, Целинн района эмнлһиг арвн негн җилдән һардҗ йовсмн. Селәнд үүлддг әңгд көдләчнрин болн нааран ирсн улсин төлә сән таал тогтагдсиг эн өөдәнәр үнлнә.
- Энд сарул хорас бәәнә, мергҗлтнр дарунь шинҗллт кехин төлә әңгин улнь батрулгдв. Физиотерапевтическ әңгд шишлң кергсл углҗ тәвгдв, тегәд олн зүсн гемәс иштә чинәнь алдрсн, шав авсн улст энд цогц-махмудан батрулхд цугнь бәәнә. Мана көдләчнр мергҗлтән өөдлүләд, өдгә цага кергсл олзлҗ көдлх зөв авв. Эн җилин хойрдгч өрәлд реабилитацин немр хора секгдхмн. Мана нег һазра улс цергә даалһвран күцәҗ йовад шавтна, тегәд эднә цогц-махмуд батруллһнд туслх кергсл хулдҗ авгдв.
Эн әңгд өдрт һучн-тәвн һар күн эмнлһ авч чадна. Медицинск эгч Бакшуда Любовь болн массаж кедг Галина Лунева эн әңгд олн җилдән көдлҗәнә, бәәрн улс эдниг күндлнә. Басңга Ирина, Бадбан Баина болн Бакшуда Любовь Әәдрхн балһснд медицинск ик сурһулин улд үүлддг колледжд мергҗлтән өөдлүлҗәнә, эдн шин кергсл олзлҗ көдлхмн. Селәнә әмтнд эрүл-мендән батрулхин төлә Элст балһсна поликлиник орх керг уга болна.
БАТАН Сәәхлә
ЗУРГТ: медицинск эгч Бакшуда Любовь көдлмштән