Туста нөкцлт өргҗәд йовна

Моһа сарин эклцәр Элстд Хальмг ик сурһулин һардач Салан Бадм болн дацңгудын һардачнр Китд орн-нутгин Сяньтао балһсна эрдмин-техникин күрәлңгин болн сурһуль-эрдмин бүрдәцсин салврар селвг өгдг нарт-делкән Ухань балһсна «Фэнъя» компаня элчнрлә онлайн күүндвр кев. Хальмг вузд китд оютнриг «Багшин сурһуль-эрдм» гидг салврар дасхлһна туск төр харһлтын йовудт хәләгдв.

- Кесг җилин туршарт бидн Китд орн-нутгин арвн һурвн ик сурһульла нөкцлтән күцәҗәнәвидн. Тер тоод Хух Хото балһснд бәәршлдг Өвр Моңһлын, Келнә болн сойлын ик сурһуль, келн-улсин политикин болн төрин ик сурһуль, Пекинә, Муданьцзян балһсна багшин болн экономикин болн бизнесин ик сурһуль, Хайнань балһсна ик сурһуль болн нань чигн. Хальмг вузин ул деер болхла Конфуцийин күрәлң секгдсн бәәнә, Әрәсәд тиим зуг 20 вуз бәәнә, – гиҗ Китдин ик сурһульмудла күцәдг олн халхин нөкцлтин тускар Салан Бадм харһлтын хөөн болсн күүндврт седкүлчнрт келҗ өгв.
Ода деерән бичкдүдин садмудын сурһмҗлачнриг болн эклц классин багшнриг белдлһнә нарт-делкән төсвиг күцәлһнд орлцхд хальмг вуз белн бәәнә, гиҗ Бадм Катинович заав. Китд орн-нутгт багшин эрдм хамгин тоомсрта болн күндтә гиҗ тоолгдна. Әрәсәд эн салврар эрдм даслһн ик соньмслтта юмн гиҗ китд мергҗлтнр тоолҗана.
«Эндр Хальмг ик сурһуль Китдин ик сурһульмудла күцәдг нөкцлтән өргҗүләд йовна, ода бидн оютнран болн багшнран тиигәрән дамшуллһна кергәр өрәл җилин, нег җилин болзгар йовулнавидн, китд багшнр Элстд көдлнә, китд кел дасхна, китд оютнр болхла орс кел дасна эс гиҗ тер халхар медрлән гүүдүлнә.
Ухань балһсна «Фэнъя» компань Китдин сурһуль-эрдмин министерствин зөвшәләр үүлдҗәнә, Әрәсән ик кемҗәтә вузмудла нөкцлт бүрдәнә, тегәд бидн эн компаньла залһлдаһан өргҗүлҗәнәвидн», – гиҗ күүндврт орлцсн хальмг вузин һардачин дарук Конин Оксана маднд цәәлһвр өгв.
Оксана Николаевнан келсәр, ода эдн китд оютнр ирлһнд белдҗәнә. Болв түрүләд нөкцлтиг эклх зөвшәрлһән Әрәсән ик сурһулин болн номин министерств болн Китдин ирлцңгү министерствд моһа сард өгх зөвтә. Түүнә хөөн Китд орн-нутгт Хальмг ик сурһулин болн Сяньтао балһсна эрдмин-техникин күрәлңгин һардачнр бооцаһан батлх.
Хальмг ик сурһулин багшнр Китдүр һарч йовх, тенд эднә һардврт өрәл җилдән оютнр орс кел дасх. Дәкәд Элстүр ирәд Хальмг ик сурһульд бас өрәл җилдән эс гиҗ нам түүнәс удан цагт орс келнә медрлән гүүдүлснә хөөн бичкдүдин садын сурһмҗлачин эрдм дасх. Эклц классин багшин эрдм даслһна тускар немр күүндвр болхмн гиҗ һардачин дарук заав.
Талдан чигн эрдмәр мергҗлтнриг белдлһнә халхар күүндвр кеҗ, нөкцлтән икдүлҗ, китд вузмудла хамцу төсвс күцәгдх, тернь Хальмг ик сурһульд болн Хальмг Таңһчд кергтә кадрмуд белдлһнд ик нилчән күргәд бәәхнь лавта. Тегәд нарт-делкән эн нөкцлт цааранднь чигн йовуд авч ховр эрдмтә мергҗлтнриг белдлһнд ик тәвцән орулҗ хойр халхд болн мана орн-нутгудт ик туста болхнь лавта. Нег үлү хальмг вузла Китдин кесг ик сурһульмуд нөкцлтән ик таастаһар күцәҗәнә, тернь җил ирвәс өргҗәд йовна, тиим шахм болн ик туста нөкцлт цааранднь чигн делгрлт авад бәәх гиҗ хойр халх нәәлҗәнә.

ТҮРВӘН Һуна