Цергчнриг дөңндг төләднь ачлв

Шидр П.Жемчуевин нертә таңһчин эмнлһнә эрүл-менд харлһна көдләчнриг «Фронтд дөң күргсн төлә» II девсңгин медаляр ачлв. Байрин керг-үүлдврт Әрәсән Өмн үзгт РФ-н Президентин күцц зөвтә элчин дарук Владимир Гурба, Хальмг Таңһчин Улсин Хуралын (Парламентин) Ахлач Артем Михайлов, таңһчд үүлддг ах федеральн инспектор Александр Беляев, Хальмг Таңһчин Толһачин һардврин ахлач Кирилл Попов, «Дәәч» гидг цергә-спортивн белдврин болн төрскнч сурһмҗин төвин һардач Җаңһан Чимид орлцв.

Хальмг Таңһчин Толһач Хаска Батун даалһврар Хальмгин хазгудын күрәлң үүдәсн ачлврар цергә шишлң керг-үүлдврт орлцачнрт дөң күргдг, цергчнрин әм аврлһнд болн эмнлһнд орлцдг улст бәрүлҗ өггднә. Цергә шишлң керг-үүлдвр эклсн цагас авн таңһчин эрүл-менд харлһна көдләчнр 600 шаху күүнә әм аврҗ дөң болв. Эмнлһнд мана цергчнр эмнлһ авч, эрүл-мендән батрулна, кесгнь энд месллһ кесмн. Тер мет эмнлһнә көдләчнр цергә даалһвр күцәҗ йовх нег һазра улст эм, хот-хол, дулан хувц, нань чигн тоот цуглулҗ күргҗ өгнә.
Фронтд дөңгән күргсн төләдән таңһчин эмнлһнә ах эмч Чумпинә Саглр, эмчнр Болдра Олег, Бамбан Савр, Халтра Мингиян, Цевгә Хоңһр, Потнян Светлана, Турлака Саглр, Умкән Элеонора, Кириша Айса, медицинск эгчнр Көкән Ольга, Ностан Ирина, Татьяна Слюсарева, Хотуна Кермн болн әәмшг уга бәәлһнә цергллтин һардач Оджан Ульяна ачлгдв. Владимир Гурба болн Җаңһан Чимид эднд ачлвринь бәрүлҗ өгәд, кеҗәх көдлмштнь күцәмҗ дурдв.
- Цергә шишлң керг-үүлдвр Төрскән харсгч Алдр дәәнлә әдлцүлҗ болхмн. Курскд, Донецкд болҗадг йовдлмудыг бидн уурулх зөвтәвидн. Мана цергчнр фронтд эврә даалһвран күцәҗ йовна, тадн болхла ахнрт, көвүдт болн авальмудт герүрн хәрҗ ирхднь туслнат, - гиҗ Владимир Гурба келв.
Таңһчин Улсин Хуралын Ахлач Артем Михайлов болн «Дәәч» цергә-спортивн белдврин болн төрскнч сурһмҗин төвин һардач Җаңһан Чимид цергә керг-үүлдврт орлцснаннь тускар тодлв. Депутатнр эрүл-менд харлһна көдләчнрт цергчнрин нерн деерәс ханлт өргв.

ДООҖАН Наталья
ЗУРГТ: таңһчин эмнлһнд болсн харһлтд орлцачнр