Әмндән күрснә туск һашута йовдл цугтаһинь үүмүлв

Сарпан района Садовое селәнд насни дигт күрәд уга көвүнд насарн ах көвүд, күчән үзүләд наад бәрснә ашт тер әмндән күрснә туск һашута йовдл учрв. Эн йовдл олн-әмтиг үүмүлв. Әрәсән мөшклһнә комитетин Хальмг Таңһчар үүлддг мөшклһнә заллт учрсн йовдлын ашар цааҗин керг бүтәв, ода мөшклһнә керг-үүлдвр күцәгдҗәнә. Әрәсән мөшклһнә комитетин Ахлач Александр Бастрыкин эн йовдлыг эврән бүрткҗәнә.

Эн долан хонгин эклцәр Хальмг Таңһчин Толһач Хаска Батун даалһврар Садовое селәнә сойлын Герт эк-эцкнрин хург болв. Насни дигт күрәд уга бичкдүдиг буру йовдлмудас саглуллһна төрәр болсн харһлтд селәнә сурһульчнрин эк-эцкнр орлцв. Хальмг Таңһчин сурһуль-эрдмин болн номин министрин дарук Натра Антон, регионмудыг заллһна төвин һардач Бамбша Арлтан болн насни дигт күрәд уга бичкдүдин керг-төрин әңгин һардач полицин майор Серкшә Мигмр чинртә төрәр эк-эцкнрлә күүндәд, эднә сурврмудт хәрү өгв. Насни дигт күрәд уга бичкдүдиг зака эвдсн йовдлмудас саглуллһна төлә таңһчин сурһуль-эрдмин бүрдәцст эк-эцкнрин хургуд, харһлтс болхмн. Дотр-дундын кергүдин, насни дигт күрәд уга бичкдүдин кергүдин комиссьмүдин болн талдан бүрдәцсин элчнр терүнд орлцхмн.
Шидр Хальмг Таңһчд бичкдүдин зөв харсдг элч Чужан Наталья Садовое селәнд одад, әмнәсн хаһцсн көвүнә өрк-бүллә харһҗ күүндв. «Хальмг Таңһчин Толһач Хаска Бату әмндән күрсн көвүнә өрк-бүлд цуг кергтә дөң күргх даалһвр өгв. Көвүнә эклә күүндәд, терүг үүмүлҗәдг төрмүдәр соньмсад, юридическ халхар цәәлһвр өггдв. Дәкәд нег эрлһнә туст немр бүртклһн күцәгдхмн. Ода зөв-йос харлһна бүрдәцс мөшклһнә керг-үүлдврмүд күцәҗәнә. Хальмг Таңһчин Толһач Хаска Бату болн зәрм бүрдәцс көвүнә өрк-бүлд цуг халхин дөң күргҗәнә. Насни дигт күрәд уга үрән геесн экд һундл төрҗ, зовлңгинь хувалцҗанавидн», - гиҗ Чужан Наталья темдглв.
Урҗ өдр, моһа сарин 18-д, таңһчин бичкдүдин зөв харсдг элч Садовое селәнә әмтнлә харһад, эдниг үүмүлҗәдг төрмүдәр тодрха цәәлһвр өгв.
БАТАН Сәәхлә