«Иргчин тускар ухалад»

Цергә шишлң керг-үүлдврт орлцсн нег һазра мана улс «Медрл» Әрәсән ниицәнә лектормудла болн «Движение первых» җисәнә гешүдлә хамдан сурһульчнрин төлә сурһмҗин халхар төсв экләд күцәҗәнә. Иим шиидвр Хальмг Таңһчин Толһачин һардврт болсн насни дигт күрәд уга бичкдүдин зөв харслһна ведомствс хоорндк комиссин сүүрин ашар батлгдв.

«Иргчин тускар ухалад» гидг төсв таңһчин цуг райодар давулгдхмн. Терүнә медлд «Медрл» Әрәсән ниицәнә лектормуд, «Движение первых» җисәнә шунмһа гешүд болн «Дәәч» цергә-спортивн белдврин болн төрскнч сурһмҗин төвин цергә керг-үүлдврин ветеранмуд сурһульчнрла харһхмн. Эдн «Чинртә төрәр болсн күүндвр» гидг керг-үүлдврмүд сурһульчнрла давулад, төрскнч сурһмҗин, чик авг-бәрцин, седвәртәһәр үүлдҗ олна бәәдл-җирһлд орлцллһна тускар күүндхмн. Тер мет әср йовдлмудас саглуллһна, наркоманяс болн әрк-чаһр эдлхәс гетллһнә, зөв-йос эвдлһнә йовдлмудас хөрлһнә төрмүд бас босхгдхмн. Бичкдүдин җисәнә гешүд олн зүсн кергин седвәр татҗ, эврә төсв белдҗ үүлдхин туст хоршасн дамшлтарн хувалцхмн.
Эн төсв сурһулин җил төгстл таңһчин сурһуль-эрдмин бүрдәц болһнд күцәгдхмн гиҗ зуралгдҗана.

БАТАН Сәәхлә