Бамб цецгүд нәәхләд, байрин цаг ирҗәнә

Хавр ирәд, теегт бамб цецгүд бултаһад һарч ирв. Улан, шар, цаһан, оошк болн нань чигн өңгтә цецгүд теегиг кеерүләд, нүднә хуҗр хаңһаҗ, бахмҗ болҗана.

Хаврин теегин сәәхн эн цагла Хальмг Таңһчур олн зуульчнр ирнә. 2025 җилин наадм нег үлү ик соньмслт үүдәҗәнә. Эн керг-үүлдврин туск зәңг цуг орн-нутгар тарад, мана олн-әмтн ирхиг күләҗәнәвидн. Дәкәд болхла Элстд шар шаҗна нарт-делкән хург болх йовдл чигн олна оньгиг авлхнь маһд уга.
«Бамб цецгин наадм» гидг нертә нәәрәр Хальмг Таңһчд мөрн сарин 5-д наадм эклҗәнә. Хальмг һазрин ке-сәәхн тоотла болн улсин сойлын зөөрлә ирсн гиичнриг таньлдулхар сойлын көдләчнр ик белдвр кеҗәнә.
Әәдрхнәс, Аһшас, Сарпуляс болн нань чигн балһсдас ирх олн-әмтн Элстд автобуст сууһад, бамб цецгүд урһдг һазрт күрч чадхмн.
Мөрн сарин 5-д ирсн гиичнр, элстихн чигн яармд орлцҗ чадҗана.
Мөрн сарин 7-11-д, 14-18-д болн 21–25-д ирсн әмтн Хальмгин ке-сәәхн тееглә, Элстин кеермҗтә тоотла таньлдхмн. Театрмудт болн музеймүдт одад, тенд һәәхүлмүдт орлцад, ямр нег наад хәләҗ болхмн.
Олна орлцата керг-үүлдврмүд ик зуудан «Иньгллт» паркин Диилврин талвңд давхмн.
Тенд мөрн сарин 5-д 14.00 наадмин байр өргмҗин бәәдлд секгдхмн, байрин ик концерт болхмн.
Тер өдрәр 11.00 әмтн яармд одад, мөр унад, темә һәәхәд амрч чадҗана.
Мөрн сарин 6-д асхлад Бамб цецгин наадмин байрин концерт болх. Нәәрт орлцх цуг коллективсин ик йовлһн цуглрсн әмтнд сергмҗ үүдәхнь лавта.
Мөрн сарин 12-т «Мини өрк-бүл» гидг зургудын марһана аш диглгдхмн, райодын улсин коллективс билгән үзүлхмн. Асхн «Өөрднр» бииһин театрин концерт әмтнд байр үүдәхмн.
Мөрн сарин 13-д мана билгтнр яһҗ ишкә кедгиг үзүлхмн. Үдин хөөн бичкдүдин студин белдсн олн хувциг һәәхҗ болхмн. Асхн шидр «Нортон» багин концертд әмтн олар цуглрх гиҗ күләгдҗәнә.
Мөрн сарин 19 өдр спортд дурта улст таасгдхнь лавта. Эн өдр йога, цигун гимнастикд орлцҗ болхмн. Спортсменмүдин һардврт цогц-махмудан батрулх таал учрҗана. Эн өдрин һол үүлдврнь «Махан-фест» хот-хоолын наадм болхмн.
Мөрн сарин 20-д «Ран-Уралан» гидг урлданд орлцҗ болҗана. Велосипед унҗ дөрлдх улст чигн сән таал тогтахмн. Асхар болхла таңһчин хореографическ коллективсин концертд ирҗ амрч болхмн.
Мөрн сарин 26-д хореографин эрдмин кичәлмүд давхмн. Келн-улсин зевсгүд татдгиг чигн энд дасч болҗана. Эн өдр асхар келн-улсин сойлын наадм болх, дарунь «Хагрин» баг концертән үзүлхмн.
Мөрн сарин 27-д - Келн-улсин сойлын наадмин кемҗәнд зарлгдсн «Хальмгин алтн» гидг марһана дииләчнрин билг-эрдмлә таньлдҗ болхмн. Улан кесг зүсн хувцн ямаран өңгтә болдгиг күүкд улс үзүлснь һәәхмҗтә болхмн. Асхн 18.00 Бамб цецгүдин наадм байрин бәәдлд көдлмшән төгсәхмн.
Тер мет мөрн сарин амрлһна өдрмүдт таңһчин райодар ирлцңгү керг-үүлдврмүд бас бүрдәгдхмн.

ҖИРҺЛИН Кермн