Диилврин 80 җилә өөнд – 80 белг

Урҗ өдр «Хальмг үнн» газетд 2024 җилд бичгдсн умшачнр дунд тогтсн авъясар урмдулгч лотерей болв. Мана агентствин һардач Марила Хоңһр болн «Хальмг үнн» газетин ах редактор Бембин Евгений керг-үүлдвриг секәд, таңһчин олн бүрдәцин көдләчнрт болн нег һазра улст хальмг газетиг дөңнәд, бичүлҗ авснд байрлад, олн белгүд йилһҗ өгсн арһлачнрт ханлтан өргв.

Нидн ут тоодан 5340 күн «Хальмг үннд» бичгдсн билә. Темдглхд, 2024- җилд мана газетд бичгдсн улс дунд Лаганя района умшачнр түрүн зергләнд йовна.
Керг-үүлдврин йовудт 80 белг шүүгдв. Эннь бас учрта болв, тер юңгад гихлә эн җил темдглгдх Алдр Диилврин 80 җилин өөнлә ирлцҗ тедү белгүдин то батлгдв. Эн кергт орлцсн Хальмгин Келн-улсин телеүзлин седкүлч Эрднин Ангелина Хар Һазра района Нарн Худг селәнә дунд сурһулин багш Таһра Надежда хамгин үнтә белг, сән һара киитрүләчиг шүүҗ авсинь зәңгләд, цуглрсн улсиг байрлулв.
Элст балһсна болн таңһчин райодын олн белгүд шүүҗ авсн умшачнран әрүн седкләсн йөрәҗәнәвидн! Цугтаднь ханлтан өргҗ, цааранднь чигн хальмг келәр һардг ор һанцхн газетән дөңнҗ йовтн, гиҗ дурдҗанавидн.
Лотерейд белгүд шүүҗ авсн улсин тускар бембә өдр, моһа сарин 29-д, барас һарсн мана газетд умшҗ болхмн.
КАРСАНА Евгения