Бичкдүдиг эмнҗәнә

Хальмг Таңһчин болн Луганск Улсин Республикин Антрацитовск района хоорнд батлгдсн нөкцлт җил ирвәс батрад йовна. Терүнә медлд эрүл-менд харлһна, сурһуль-эрдмин, социальн, хулд-гүүлгәнә, тосхлтын болн жилищн-коммунальн эдл-ахун халхар хәрлцән делгрҗәнә. Тиигәд, мана таңһчин эмчнр Антрацитовск районд одад, бәәрн улсин эрүл-мендин бәәдл шинҗлҗ, эмнлһнә туст дөңгән күргнә. Нидн хальмг эмчнрин шинҗллтд орсн бичкдүд мана таңһчур ирәд, энд эмнлһ авад, эрүл-мендән батрулсн билә.

Шидр дәкәд 6 күүкн-көвүн мана тал ирәд, таңһчин гемтә-шалтгта бичкдүдин реабилитацин Төвд эмнүлгдҗәнә. Хойр долан хонгин эргцд эн төвин «Эк болн үрн» әңгин улд бичкдүд цогц-махмудан батрулхмн, эк-эцкнр болхла эн туст хөөннь гертән олзлх дамшлт хоршахмн. Реабилитацин төвин мергҗлтнр түрүләд бичкдүдин эрүл-мендин бәәдл шинҗләд, ямаран эмнлһн болн нань чигн дөң кергтәг йилһҗ авв.
В.Манджиеван нертә таңһчин бичкдүдин медицинск Төвин эмчнр күүкд-көвүдин эрүл-мендин бәәдл бас шинҗлҗ эмнлһнә туст сүв-селвгән өгв. Бичкдүдиг кардиолог, окулист болн невролог эмчнр хәләв, эднд зүркнә шинҗллт кегдв. Хәләврин ашар бичкдүдт илдкгдсн гемиг эдгәлһнә, туст эмнлһнә керг-үүлдврмүд эклв. Хойр бичкнә нүдинь шинҗлснә дару, негнднь козлдур йилһҗ авгдв. Нег күүкнд шишлң эмнлһн кегдснә хөөн ода эн цогц-махмудан батрулҗана. Энд эмнлһ авчадг гемтә-шалтгта нег көвүн бас эмчнрин хәләврт сәәнәр эдгҗәнә.
- Эн өдрмүдт мана таңһчд Антрацитовск районас эрмдгтә бичкдүдин хойрдгч багнь ирсн бәәнә. Тедн дунд хойрнь цергә шишлң керг-үүлдврт орлцачнрин үрд болна. Эмнлһнә болн социальн реабилитацин халхар дөң күргсн деерән бидн бичкдүдин болн эднә эк-эцкнрин төлә соньн керг-үүлдврмүд бүрдәҗ, мана таңһчла таньлдулхвидн. Тегәд гиичнр эрүл-мендән батрулсн деерән хотл балһсна һәәхмҗтә ормс үзҗ, сергмҗтәһәр амрч чадх, – гиҗ таңһчин залврин Ахлачин дарукин –таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Марина келв.
Бичкдүдин эк-эцкнр эднд килмҗән тусхаҗ, нааран авч ирхд дөңгән күргснд, бүләнәр тосч сән таал тогтаснд ик ханлтта бәәхән медүлв. Давсн җилин намрар мана таңһчур ирсн гемтә-шалтгта бичкдүдт эрүл-мендән батрулснь чидл урһаһад, мана таңһчиг бүләнәр тодлҗ, эмнлһн таасгдсиг темдглнә гиҗ гиичнр хувалцв. Әмтнә социальн теткврин Антрацитовск төвин социальн реабилитацин әңгин хәләврт эрмдгтә 64 күүкн-көвүн бәәнә.
БАТАН Сәәхлә
ЗУРГТ: ЛНР-ин Антрацитовск районас ирсн бичкдүд эмнлһ авчана