Медәтнрт – онц килмҗ

«Ах үйин улс» гидг келн-улсин төсвин медлд күцәгдҗәдг керг-үүлдврмүдин тускар шидр болсн селвлцәнд өргн күүндвр болв. Хальмг Таңһчин залврин Ахлачин дарукин-таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Маринан һардврт болсн харһлтд ах үйин улсин эрүл-менд батруллһна болн медәтнр ут нас наслҗ чик авг-бәрцәр бәәлһнә төрмүд хәләгдв.
Сүл кесн то-дигәр, мана таңһчд 56,8 миңһн медәт бәәнә, эннь таңһчд бәәдг улсин 21,3 процент тогтана. Ут нас насллһна көтлврин керг-үүлдврмүдиг шинрүләд, медәтнрин эрүл-менд батруллһна, эдн цаган тустаһар болн сергмҗтәһәр давуллһна, чик авг-бәрцәр бәәлһнә туст көдлмшән ясрулх кергтә гиҗ Өлзәтин Марина темдглв. Эн көтлвр тавн зөрүллтәр күцәгднә, эннь чик авг-бәрц, социальн зуульчллһн, эврә сән дурар үүлдвр, сойлын болн сурһулин керг-үүлдврмүд болна. 2019 җиләс авн мана таңһчд медәтнрин төлә 11 миңһн керг-үүлдвр бүрдәгдв, терүнд 5,4 миңһн медәт орлцв. Урднь әмтнә социальн теткврин комплексн төвмүдин болн «Родина» сойлын бүрдәцин улд ах үйин улсин төлә олн зүсн керг-үүлдврмүд давулгддг бәәсмн. Ода болхла медәтнр сойлын гермүдт, баһчудын төвмүдт, мобильн дегтрин саңгудт, спортивн талвңгудт болдг керг-үүлдврмүдт орлцх зөвтә.
ДООҖАН Наталья