Сурһуль сурлһна тускар

Шидр Хальмг Таңһчин залврин Ахлачин дарукин – таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Маринан һардврт «Төрскән харсачнр» гидг шаңһа саңгин үүлдврин төрмүдәр бәәдг ведомствс хоорндк комиссин дарани сүүр болв. Терүнд цергә шишлң керг-үүлдврт орлцачнр болн теднә өрк-бүлмүдин гешүд ик болн дунд шишлң сурһулин бүрдәцст сурһуль сурлһна төр хәләгдв.
Таңһчин сурһуль-эрдмин болн номин министерствин зәңгәр, ода цергчнр болн теднә өрк-бүлмүдин гешүд дундас 79 күн дунд шишлң сурһулин бүрдәцст сурчана. Ик сурһульд мөңгән өгәд сурчадг цергчнрин күүкдиг өңгәр сурһуль сурлһнд һарһлһна туск эрлһс саңгин хайгар орҗ ирсн бәәнә. Болв эн төр ода чигн хаһлгдад уга, тегәд Өлзәтин Марина Хальмг ик сурһулин болн медколледжин һардврт эн төр хаһлхин туст сүв-селвг белдх даалһвр өгв. Тиигәд, оютнриг өңгәр сурлһна эс гиҗ мөңгнә кемҗәг баһруллһна төр хаһлх кергтә гиҗ дааврта һардач келв. Таңһчин сурһуль-эрдмин болн финансин министерствс медколледжд онц зөв эдлдг улсин төлә өңгәр сурх ормин то икдүлхин төр хаһлхмн.
Тер мет сүүрт зәңг-зә уга геедрсн цергчнриг хәәлһнә нәрн төр босхгдв. «Төрскән харсачнр» гидг шаңһа саңгин таңһчд үүлддг әңг цергә комиссариатмудла, күүнә зөв харсдг элчлә болн эврә сән дурар үүлддг улсин хәәврин ниицәслә хамдан эн чинртә төриг хаһлҗ үүлдхмн. Хальмг Таңһчин цергә комиссариатын цергә-эмчин шинҗллтин төв күцәҗәдг көдлмшиннь тускар бас зәңглв. Тиигәд, Әрәсән харслтын Министерствин хайгар илгәсн бичгт цергә-эмчин шинҗллтиг дор ормднь күцәхин туст зөв өгхиг сурсмн. Аштнь амрлһнд болн эмнлһнд бәәсн цагтан терүг күцәх зөв өггдв.
ДООҖАН Наталья