Күцәмҗ бәрсн Орһан Наяна

Татарстана хотл Хазн балһснд моһа сарин чилгчәр делкән урн-билгин сойлын (МХК) төрәр сурһульчнрин Цугәрәсән марһан болв. Хальмг Таңһчиг энд Элстин 17-ч тойгта сурһулин 10-ч классин сурһульч Орһан Наяна элчлв. Йилһән сәәнәр сурдг күүкн сән күцәмҗ бәрҗ, кергтә дамшлт хоршав.

- Мана таңһчин элч түрүн болҗ тиим ик марһанд һарч йовла, ода Наянан нилчәр Әрәсән сурһульчнрин марһанд тәвдг неквр улм тодрхаһар медгдх, – гиҗ сурһульчин багш Шарапа Ольга келв. - Болв түрүләд Наяна таңһчин марһанд негдгч орм эзллә, цуг даалһврин 70 һар процентынь күцәв, тегәд Цугәрәсән марһанд орлцх зөв авла. Хазнд болсн орн-нутгин марһан хойр өдртән болв, тиим олн даалһвр сурһульчнрт өггдв, – гиҗ Ольга Петровна цәәлһв.
Марһана даалһврнь амр болсн уга. Ут турштан марһанд Әрәсән 78 регионас 295 күн орлцв. Дииләчнрин болн призермудын дипломсар 137 сурһульч ачлгдв, ик зунь Москван болн Москван мүҗин, Татарстана элчнр бәәсмн гиҗ келх кергтә. Тер тоод 5-ч класст сурдг күүкн 9-ч классин даалһвриг күцәв. Дииләчин күндтә нериг 24 күн зүүв.
Наяна түрүн болҗ тиим ик марһанд орлцв. Дарук җилин марһанд 17-ч сурһулин элч улм өөдән ашт күрч чадх гиҗ сангдна. Наяна зурачин сурһульд сурна, тер медрлнь бас дөң болна.
Орлцач болһн билг-эрдмин кесг халхиг сәәнәр медх зөвтә болна. Көгҗмин халхар медрлән гүүдүлхин төлә Наянад КРИПКРО-н ах багш Ольга Краснокутская дөң болсмн, билгтә күүкдиг сурһлһна таңһчин төвд дамшлтта мергҗлт һурвн өдртән кичәлән өгв.
Орн-нутгар Цугәрәсән марһанд ут турштан 7 сай күн җил болһн орлцна. Марһан дөрвн девсңгәр күцәгднә. Мана таңһчд делкән урн-билгин сойлын (МХК) марһанд 17-ч сурһулин арвтнр кесг дәкҗ түрүн орм эзлҗ, дииләчнрин нер зүүҗәлә. Бат медрлинь эднд Ольга Петровна заана. 17-ч тойгта сурһулин талдан багшнр чигн күүкдт гүн медрл өгнә, тернь арвтнрт туста болна.
Урднь МХК-н марһаст орлцҗасн сурһульчнр ода Москван болн талдан нертә ик сурһульмудт сурна. Мана таңһчин элч түрүн болҗ Цугәрәсән марһанд орлцҗ дамшлтан хоршав, ода эн кичәләр соньмсдг арвтнрин то өсәд йовтха гиҗ дурдҗанавидн.
ТҮРВӘН Һуна