Өвәрц эрдмтә эмч Хоньна Валерий

Хальмг Таңһчин болн Әрәсән ачта эмч Хоньна Валерий таңһчин эрүл-менд харлһна делгрлтд ик тәвцән орулсн, кесг баахн эмчнрин төлҗлтд туслсн төләдән сурһмҗлгч болҗ күндлгднә. Эн өдрмүдт Валерий Михайлович 75 насна ончта өөнән темдглв. Хамдан көдлҗәдг үүрмүднь, нег һазра улснь эмчиг йөрәв.
Хоньна Валерий Красноярск крайин Назаровск района Назарово селәнд һарсмн. Приозерн района Советское (ода Көтчнр) селәнә дунд сурһуль төгсәснә дару хойр җилдән церглв. 1970 җилд Аһш балһснд медицинск ик сурһульд сурад, эмчин эрдмтә болв. Күч-көлснә хаалһан таңһчин эмнлһнд экләд, хөөннь Сарпан района эмнлһнә әңгд көдлсмн. 1981-1984 җилмүдт Валерий Михайлович Аршан Зелмн селәнә эмнлһиг һардв. Сарпуль балһснд ординатурт сурсна хөөн эн Сарпан болн Целинн райодын болн П.Жемчуевин нертә эмнлһст көдләд, шавтсн болн көл-һаран авсн кесг күүнд месллһ кеҗ эдгәв. Гүн медрлтә, өөдән мергҗлттә болад, Илизаровин эмнлһнә эв-арһс олзлад, өөдән чинртә месллһ кеҗ кесг күүнд дөң болсмн. Валерий Михайлович баахн эмчнрлә байн дамшлтарн хувалцҗ, медсән-чадсан зааһад, эднә мергҗллтынь өөдлүлсмн.
Сүл җилмүдт Хоньна Валерий Лаганя района эмнлһнд көдлҗәнә. Эн һазрар шаңһа хаалһс давдг учрар дару-дарунь зеткртә йовдлмуд учрна. Тегәд олн зүсн шав авсн улст дөң болхин төлә района эмнлһнд 2020 җилд ирлцңгү төв секгдсмн. Района эмнлһнә ах эмч Шарапа Николайин келсәр, Хоньна Валерий месллһ кеҗ, көл-һаран авсн улст өөдән чинртә эмнлһ кенә.
- Валерий Михайлович үүдәҗ һарһсн олн зүсн эв-арһс месллһ болн эмнлһ келһнд өргнәр олзлгдна, тегәд сән гисн төвмүдин тоод йовнавидн. Байн дамшлтта, өөдән мергҗлттә, оньдин медрлән гүүдүлҗ шин эв-арһсин тускар медҗ авхар шундг төләдән эн маднд үлгүр-үзмҗ болна. Дәкәд Валерий Михайлович уул деер давшад, нертә альпинист болҗ нер һарна. Эн нарт-делкәд бәәдг кесг уул деер һарсмн, тегәд эс күрсн һазр уга. Ода эн Эльбрус деер һарх улсиг дахад, дөң болна. Намрин-үвлин кемд эн уснд өөмнә, бий деерән киитн ус асхч цогц-махмудан батрулна. Лагань балһсна «Көк теңгсин айс» паркд өдр болһн өрүн эрт чик авг-бәрцәр бәәдг улсин баг Валерий Михайловичин һардврт йовһар йовна, 20 дууна һазрт гүүнә. Эн багд ода 40 һар күн орна, болв өдр ирвәс бәәх улсин то өсәд йовна. Мана района эмнлһнә көдләчнрин болн таңһчин эмчнрин нерн деерәс күндтә Валерий Михайловичиг ончта өөнләнь йөрәҗ, олн җилдән эрүл-дарүл, сән-сәәхн бәәхиг дурдҗанав. Ода мана үр Ханты-Мансийскд бәәдг күүкдтән болн ачнр-зеенртән гиичлҗәнә, тенд өөнән темдглҗәнә. Болв хәрҗ ирхләнь бидн эрк биш бас йөрәҗ, бүлән үгән келхвидн, - гиҗ Николай Михайлович келв.
Хоньна Валерий Әрәсән Орн-нутгин Хүүвин депутат Башанкан Бадмла олн җилдән үүрлҗ йовна. Бадм Николаевичлә хамдан эдн Донецк Улсин Республикд одад, Макеевка балһсна эмнлһнд көдлсмн. Цергә шишлң керг-үүлдвр эклсн цагт Валерий Михайлович эврә сән дурар тиигәрән одхар седв. Бадм Николаевичин нилчәр эн тиигәрән одад, шавтсн улст месллһ кеҗ, бәәрн эмчнрлә дамшлтарн хувалцсмн. Хоньна Валерий «Негдсн Әрәсә» партин «Эрүл-менд иргч» гидг төсвин олна хүүвин гешүн болад, ах болн дунд үйин улс дунд чик авг-бәрцин туст харһлтс давулна.
- Хоньна Валерий өвәрц күн, өөдән мергҗлттә эмч, хойр һарнь алтн, гиҗ өөркснь келнә. Валерий Михайлович нертә хальмг шүлгч болн баатр Хоньна Михаилын көвүн мөн. «Донбассин медицинә үүрмүд» ниицәнә, Хальмг Таңһчин эрүл-менд харлһна көдләчнрин болн эврә нерн деерәс ончта өөнләнь йөрәҗәнәв, ут нас наслтха, - гиҗ Бадм Николаевич ах үүрән йөрәв.
2023 җилд Хальмг Таңһчин Толһач Хаска Бату Басан Бадьминович Городовиковин нертә орденәр Хальмг Таңһчин болн Әрәсән ачта эмч Хоньна Валерийиг ачлсмн. Валерий Михайлович Басан Бадьминовичлә әдл эврәннь улстан болн Төрскндән үнн кевәр церглҗәнә», - гиҗ таңһчин Толһач темдглсмн.

ДООҖАН Наталья