Хальмг келндән дурта күүкн

Өлзәтин Полина (зургт) Элст балһсна 4-ч тойгта дунд сурһулин 6-ч класст сурна. Җил болһн сурһульд, балһснд, таңһчд давулгддг марһаст, олимпиадт эн шунмһаһар орлцад, нүүрлгч орм эзлнә.

Күүкн 4-ч класст сурчаһад, хальмг келәр болсн балһсна олимпиадт орлцад, түрүн ормд, таңһчин марһанд хойрдгч ормд һарсн билә. Нидн болн эн җил Полина хальмг келнә балһсна болн таңһчин девсңд негдгч ормд һарв.
Хальмг келндән дурта күүкн гүн медрлтә, билгтә, олн халхар соньмсна. Эн орс келәр, эсвәр болн географяр болсн олимпиадт орлцад, нүүрлгч орм эзлдгнь темдгтә.
Дәкәд Полина шатр наадхдан йир дурта. Дөрвн настаднь аавнь дурта ач күүкндән шатр нааддг эрдм дасхҗ. Терүнәс нааран шатрар соньмсад, бас олн марһанд орлцна. 2024 җилин зунар Сергей Корякинә нилчәр давулгдсн марһанд нүүрт һарсн төләднь энүг «Артек» гидг нарт-делкән төвд амрх путевкар ачлсмн.
Дәкәд күүкн домбр цокдг дасчана. Сурһульд болдг нәәрт домбран цокад, олн-әмтиг билг-эрдмәрн байрлулна. Полина өрк-бүлдән ууһн үрн болсндан, экдән сән кевәр нөкд болна. Дүүнрән хәләһәд, олн герин көдлмшт орлцад, чидләрн эк-эцкән дөңннә. Олн үртә эк-эцк һурвн үрндән чик сурһмҗ өгч, ах улсиг күндлдгиг, өөрән бәәх улст өр-өвч седкләсн дөң болхиг, әмтнлә тевчңгү болхиг заана. Тегәд Полина цаһан седклтә, ээлтә, номһн, сәәхн заңта болн авг-бәрцтә күн болҗ өсчәхнь байрта.
Өлзәтин Полинаг би 1-ч классас авн хальмг келәр дасхнав. Эврә үрнләһән әдл тоолнав. Цаарандан чигн сәәнәр сурһулян сурад, Төрскндән туста үрн болҗ өстхә гиҗ саннав. Ода деерән күүкн мел «5» гидг темдгәр йилһән сәәнәр сурна. Хаалһнь цаһан болтха, эк-эцкдән өлзәтә сән үрн болҗ өстхә, гиҗ Полинад цаһан седкләсн дурдҗанав.
НИМӘН Тамара,
Элст балһсна 4-ч тойгта дунд сурһулин хальмг келнә багш