Чик хаалһ шүүҗ авхар

Одахн Элстд «Негдсн Әрәсә» партин олна дөңнлтин штабин талвңд Хальмг Таңһчин залврин седвәрәр олна бүрдәцсин болн зөв-йос харлһна органмудын элчнрин төгрг ширән сүүр болв. «Хальмг Таңһчд пробацин институтыг бүрдәлһнә болн делгрүллһнә кергт олна тогтацсин тәвциг өргҗүллһнә тускар» гидг төрәр өргн күүндвр болв.
Сүүрин йовудыг таңһчин залврин Ахлачин дарукин болн социальн делгрлтин, күч-көлснә болн көдлмшәр тетклһнә министрин цаг зуур үүл дааһач Өлзәтин Марина һардв. Нүр үгиг сүүрт Әрәсән Олна палатын әәмшг уга бәәлһнә болн Әрәсән субъектсин юм харлһна-бүртклһнә олна комиссьмүдлә нөкцлт кедг комиссин ахлачин дарук Александр Воронцов келв.
- Пробац гидг үгин чинрин тускар невчк тодрхаһар келхәр седләв, тер үг мана шаңгин болн олна бүрдәцсин төлә шин болҗана. Засгла харһсн, түүрмәс һарчах улст дөң боллһна, теднд күч-көлснә болн бәәдл-җирһлин таал тогталһна төрмүдт улм ик оньган өгхмн гисн чинртә үг эн болҗана. Пробацин туск закан 2023 җилин эклцәр батлгдла. Әрәсән регионмудт эн закан яһҗ күцәгдҗәхин тускар РФ-н Олна палат бас соньмсҗ бүртклһ кеҗәнә. Эн төрмүдт эндрк төгрг ширән сүүр нерәдгдҗәнә. Талдан регионмудт ямаран дамшлт хоршагдсна тускар бидн бас келҗ өгнәвидн,- гиҗ Александр Васильевич тоолвран келв.
Әрәсән 12 регионд одад ирүвидн. Засгла харһуллһиг күцәдг болн зөв-йосна бүрдәцс олна харлһна-бүртклһнә комиссьмүдлә яһҗ нөкцлтҗәхин тускар энд күүндвр болхмн. Олна шаңһа болн бүрдәцс органмуд түүрмәс һарсн улст ямаран дөңгән күргҗәхин тускар тоолврарн хувалцхвидн. Олна бүрдәцсин чинрнь эн керг-үүлдврт өсәд бәәх йоста. Эн туст Хальмг Таңһчд шинрүллһнә үүлдвр экләд күцәгдҗәнә гиҗ келҗ болҗана гиҗ Әрәсән Олна палатын элч келв.
- Мана дөң некҗәх күн болһнд бидн нөкд болнавидн, теднә төлә онц көтлвр кенәвидн. Давсн җил засгла харһсн болн түүрмәс сулдхгдҗах 160 күн маднд эрлһән бичлә, эднәс 130 күүнд бидн кергтә туслмҗ күргләвидн. Теднд көдлмш олҗ өглһнә, эрүл-мендинь бүртклһнә, шин эрдм дасҗ авлһна халхар дөңгән күргләвидн, тер тоод Башантан агроколледжд йовуллавидн, – гиҗ таңһчин залврин Ахлачин дарукин үүл дааҗах Өлзәтин Марина келв. – Тер мет 2025 җил 40 күн бас тиим халхар дөң шаңһас авла. Эрүл-менд харлһна, сурһуль-эрдмин болн номин, тер мет спортын болн мана министерств чигн УФСин-ә органмудла пробацин туск зака күцәлһнә төрәр бооца батлв. Түүрмәс һарсн улст дөң боллһна төвмүд талдан регионмудт тогтагдҗана. Эндр өдр манад тиим онц талвң тогтах керг бәәнә гиҗ келҗ болшго. Болв өөрхн иргчд пробацин туск закаг күцәхин төлә цуг таал тогтагдх гиҗ келҗ болҗана, – гиҗ Марина Петровна сүүрт келсн үгдән заав.
Засгла харһсн улст бәәдл-җирһлин, күч-көлснә таал тогталһна туск пробацин закан яһҗ күцәгдҗәхин тускар Хальмг Таңһчар бәәх Әрәсән Минюстын заллтын һардач Канибек Ураимов болн таңһчин УФСИН-ә һардачин дарук Җахнан Басң ахр тооцаһан өгв.
ТҮРВӘН Һуна