Бамб цецг бичә таслтн!

Эн өдрмүдт мана таңһчд бамб цецгин наадм эклсн бәәнә. Сара хонгтан таңһчд олн зүсн керг-үүлдвр болхмн, кесг гиичнр мана тал ирхмн. Эн наадмд орлцх улс бамб цецгиг һәәхч, әрүнәр хадһлхин төлә бүртклһнә керг-үүлдврмүд бүрдәгдсн бәәнә. Хальмг Таңһчин йиртмҗин көрңгин болн эргндк йиртмҗ харлһна министрин дарук Саңһҗин Олег, министерствин әңгүдин һардачнр Бован Виктор болн Олег Сидоров, «Хальмг Таңһчин онц кевәр хардг йиртмҗин һазрин дирекц» шаңһа бүрдәцин һардач Адьяна Александр, Хальмгин урһа модна эдл-ахун һардачин дарук Санҗин Делгр таңһчин олнд зәңгллһнә эв-арһсин көдләчнрт терүнә тускар келҗ өгв. Саңһҗин Олегин зәңглсәр, таңһчин йиртмҗин көрңгин болн эргндк йиртмҗ харлһна министерств наадм болҗах кемд бамб цецгиг харлһна керг-үүлдврмүд бүрдәв. Ода 38 инспектор болн эврә сән дурар үүлдҗәдг 26 көдләч бамб цецг цецгәрҗәх кемд бүртклһнә керг-үүлдврмүд давулҗ, цецгә таслсн улсиг шоодврла харһулх зөвтә. Эн кемд таңһчин цуг райодар 21 шишлң машин йовҗ, бамб цецг урһҗадг һазриг бүрткҗәнә. Мана таңһчд бамб цецг Приютна болн Целинн райодт элвгәр урһна, тенд онц оньг өггдҗәнә. Инспектормуд әмтнлә, нег үлү зуульчлҗ ирсн гиичнрлә күүндвр давулҗ, бамб цецгин туск зәңгллһнә цаас түгәҗ өгчәнә. Министерств таңһчин дотр-дундын кергүдин министерствлә болн райодын муниципальн бүрдәцслә нөкцҗ хамдан үүлдҗәнә. Тер мет эврә сән дурар нөкд болх санаһан медүлсн 148 күн бамб цецг харлһна кергт орлцҗана.
Мана таңһчд һурвн зүсн бамб цецг урһна, негнь Әрәсән, хойрнь Хальмг Таңһчин Улан дегтрт орулгдсмн. Тегәд ховр цецгә таслсн улс 2500-5000 арслңга ялд уңһагдхмн. Сүл цагт бамб цецг таслсн улсин то кесг холванд баһрв, гиҗ харһлтд орлцачнр темдглв. Әмтн ке-сәәхн теегт зурган цокад, сергмҗтәһәр амрад бамб цецг һәәхнә.

ДАВАН Наталья