Хальмгин депутатнрин седвәриг дөңнв

Шидр Анапа балһснд Әрәсән Өмн үзгин Парламентск Ассоциацин (ЮРПА) 42-ч хург болв. Хальмг Таңһчин Улсин Хуралын (Парламентин) Ахлач Артем Михайлов мана делегациг һардҗ тиигәрән одв. Таңһчин Улсин Хуралын Ахлачин дарукс Бадмин Вячеслав болн Нуура Николай, депутатнр Җаңһан Чимид, Дорҗин Артур, Кокан Михаил, Мацга Татьяна, Пүрбән Олег, Саңһҗин Лаг, Салан Бадм болн Цевгә Григорий терүнә ханьд орв.
Түрүн өдр ЮРПА-н комитетмүдин болн комиссьмүдин сүүр болв. ЮРПА-н хүүв хургт хәләгдх төрмүд батлҗ авв. Тиигәд, Әрәсән Өмн үзгин округд ордг зака үүдәгч бүрдәцсин элчнр ут тоодан 70 төр хәләв. Цуһар эдн регионмудын экономик батруллһнд, әмтнә җирһлин таал ясруллһнд туслх чинртә төрмүд болв. Регионмудын зака үүдәгч бүрдәцс олн зүсн төрәр орн-нутгин закадт сольвр оруллһна, Әрәсән Орн-нутгин Хүүвин Ахлач Вячеслав Володина нернд дуудвр йовуллһна туск седвәр татв. Үлгүрнь, таңһчин Улсин Хуралын депутатнр урднь 18-ч сессьт хәләһәд шиидвр батлсн дөрвн закана туст седвәр татв. Тиигәд, лавкин кассин өөр әрк-чаһр хулдхиг хөрлһнә, модна хамтхасдыг болн бүчрмүдиг бас хату хог-богд тоолҗ, терүг зөөҗ һарһлһна туст орн-нутгин закадт сольвр орулх кергтә гиҗ хальмг депутатнр тоолҗана. Тер мет Әрәсән тосхлтын болн жилищн-коммунальн эдла-ахун министр Ирек Файзуллинд, «Модернизация коммунальной инфраструктуры» гидг орн-нутгин төсвин йовудт ус цеврллһнә болн усар тетклһнә бүрдәцсин талвң тосхлһна болн Әрәсән йиртмҗин көрңгин болн экологин министр Александр Козловин нернд бичгүд бичәд, хату хог-бог зөөдг региональн оператормудт шишлң көлг хулдҗ авлһнд шаңһас мөңг йилһҗ өгхин туст бас седвәр орулв.
Ик хургт орлцачнр ЮРПА-н 25 җилин өөнд нерәдәд санлын темдгин туск тогтавр батлв. Өөнд нерәдгдсн керг-үүлдврмүд ирх җилд болхмн гиҗ зуралгдҗана. Дәкәд «Әрәсән Өмн үзгин ачта парламентарий» гидг ЮРПА-н нер зүүлһнә туст тогтавр бас батлгдҗ, ниицәнә делгрлтд тәвцән орулсн улсин ач-тус темдглҗ ачлхин тускар күүндвр болв.
Ик хургт орлцсн делегацсин һардачнр ЮРПА-н дарани сүүр давулх орм йилһҗ авв. Тиигәд, олна шиидврәр дарани хург Аһш балһснд болхмн. Әрәсән Президент Төрскән харсачин җил зарлсмн, эн җил бидн Алдр Диилврин 80 җилин ончта өөн темдглҗәнәвидн. Тегәд зака үүдәгч хургудын һардачнрин тоолврар, Аһш балһснд дарани хург давулх шиидвр орта болсмн. Краснодарск крайин зака үүдәгч Хургин Ахлач Юрий Бурлаченко Аһшин мүҗин Хүүвин Ахлач Александр Блошкинд ЮРПА-н туг бәрүлҗ өгв.

ДООҖАН Наталья