Тооһин экономикиг делгрүлх

Эндр шин технологий кесг салврар делгрлт авчана. Тер тоод зәңгллһнә технологий болн программировань кесг салг-үүлдврт болн экономикин салврмудт экләд олзлгдҗана, өөрхн иргчд тооһин технологий, тер тоод тооһин экономик ик делгрлт авх, терүг эндрк өдрин дамшлт дигтәһәр иткүлҗәнә.

Тер учр-утхар түшг кеҗ таңһчин залвр шишлң дунд сурһульта, эрдмтә программистнриг, зәңгллһнә технологийсин мергҗлтнриг, малын эмчнриг болн тосхачнриг белдх шиидвр авла.
– Түүнә төлә Хальмг ик сурһулин болн сурһуль-эрдмин болн номин министерствин хоорнд тиим мергҗлтнриг белдлһнә бооцан батлгдла. Тернь таңһчин залврин төвәр кеҗәх шишлң күслтә белдвр болхмн. Яһад гихлә колледж төгсәснә хөөн заасн янзта баһ наста мергҗлтнр бооцанд хәләсн салг-үүлдврт эс гиҗ бүрдәцд ирҗ көдлх,- гиҗ Хальмг ик сурһулин һардачин дарук Конин Оксана цәәлһвр өгв. – Тер тоод мөрн сарин эклцәр хальмг вузин әңгнь болҗах Башантан Ф. Поповин нертә колледжин 15 оютн «Зәңгллһнә системс болн программировань» гидг эрдмәр сурлһна бооца таңһчин салг-үүлдврин болн бүрдәцсин элчнрлә батлад һаран тәвв, - гиҗ Оксана Николаевна цааранднь келҗ өгв.
Тер Элстин болн райодын бүрдәцсиг Башантан колледжла нөкцлт келһнд таңһчин тооһин делгрлтин министерств урмдулҗана, Хальмг ик сурһульла чигн министерств нөкцлтин туск бооца батлла, түүнә хөөн Башантан колледжин оютнр эн төсвд өргнәр орлцулгдҗана.
Тиим ик чинртә йовдлла негдгч курсин баһчудыг таңһчин залврин Ахлачин дарукин болн тооһин делгрлтин министрин үүл дааһач Этән Алексей, Хальмг ик сурһулин һардач Салан Бадм, райодын толһачнр йөрәв.
«Бооцаһан батлсна хөөн тадн эрк биш нөкцлтин бүрдәцст көдлмш олҗ авхит, тиим кевәр бидн баһ наста шин эрдмтә мергҗлтнриг дөңнҗәнәвидн. Бооцаһар оютнриг сурһлһна седвәриг хамгин түрүнд Ик Буурла, Октябрьск, Целинн, Лаганя болн Городовиковск райодын толһачнр дөңнв. Энтн мана региона экономикиг делгрүлхин төлә күцәҗәх хол хәләцтә стратегин ик чинртә ишкдл болҗана, тиим кевәр бидн цагин некврлә ирлцәтә мергҗлтнриг белдҗәнәвидн», - гиҗ Этән Алексей темдглв.
Башантан Ф.Поповин нертә колледжин негдгч курсин оютн Чодлан Данзн программистин дурта эрдмән дасч таңһчдан тусан күргх седклән медүлв:«Би ик байртаһар эн бооцанд һаран тәвҗәнәв. Тооһин технологийиг улм өргнәр олзлх арһ мана эрдм өгчәнә, тиим кевәр бидн мана сәәхн иргчин бат ул тогтаҗ, делкәг сольҗ чадхвидн. Түшгч вузин һардач Бадм Катиновичд болн Хальмг Таңһчин залврт ханлтан өргхәр седләв. Эдн баһчудыг дөңнҗәнә, тернь хамгин чик үүлдвр болҗана, тер мет маднд сән, өдгә цагин эрдм дасх болн төрскн таңһчдан цааранднь көдлх арһ өгчәнә», - гиҗ оютн байрта-бахтаһар келв. Колледжән төгсәснә хөөн Данзн төрскн Октябрьск райондан цааранднь тааста эрдмәрн көдлх, тиим арһ энүнд районла батлсн бооцан өгчәнә.
РМО-син һардачнр бас баһчудыг йөрәҗ соньн эрдмән сәәнәр дастн, бидн тадниг теңкән угаһар күләҗәнәвидн гиҗ иткүлв. «Таднд бәәдл-җирһлин болн күч-көлснә сән таал тогтахар белдҗәнәвидн, тиим кевәр тадн районд болн таңһчдан улм ик тусан күргхит», - гиҗ Ик Буурла района толһач Көкән Арслң келв. «Таңһчин райодын толһачнрин ик зунь эрдмән Хальмг ик сурһульд дасч авла, тиим кевәр мана түшгч вуз йилһән сән мергҗлтнриг болн нүүрләчнриг белднә гиҗ лавтаһар келҗ болҗана. Мана таңһчиг делгрүлтн, түүнә төлә эрдмән сәәнәр дасч суртн гиҗ йоста сән сурһмҗ өгнә», - гиҗ Октябрьск РМО-н толһач Увшан Басң темдглв.

ТҮРВӘН Һуна