Лаганя бичкдүд цергчнрт золһҗ ирв

Шидр Лагань балһсна 3-ч тойгта дунд сурһулин 6 «б» классин күүкд-көвүд П.Жемчуевин нертә таңһчин эмнлһнд эрүл-мендән батрулҗадг цергчнрт золһҗ ирв (зургт). Бичкдүд цергчнрт шүлг айслулҗ умшад, дәәнә цага дуд дуулад, би бииләд, билг-эрдмәрн байрлулв.

Сурһульчнрин багш Елена Павлован келсәр, эдн Цугәрәсән «Би иргнв» гидг төсвин медлд «Фронтын бригадмудын хаалһар» гидг төсвд орлцҗана. «Төрскән харсгч Алдр дәәнә цагт фронтын бригадмуд госпитальмудар йовад, эмнлһнд бәәдг салдсмудыг урмдулдг бәәсмн. Бидн бас тиим күсл тәвәд, билг-эрдмән мана цергчнрт үзүләд, дарунь эдгхд урмд өгч байрлулх санатавидн. Эннь мана түрүн концерт болв. Цааранднь Әәдрхн балһснд эмнлһнд бәәдг цергә керг-үүлдврт орлцачнрт одхар зуралҗанавидн», - гиҗ багш келв.
Концерт хәләхәр ирсн улс дунд дәәнә ветеранмудын госпитальд эмнлһ авчадг улс бәәсмн. Төрскән харсгч Алдр дәәнд орлцсн мана аавнрин ачнр-зеенр ода цергә шишлң керг-үүлдврт орлцҗана. Эдн аавнриннь нердиг өөдәнәр бәрҗ, залу-зөрмг кевәр дәәлдҗ йовна. Кесгнь шарх-шаван эдгәһәд, хамдан церглҗ йовх үүрмүдтән одхар адһҗана. Сурһульчнрин концерт эднә седкл байсаҗ, ик байр-бахмҗ үүдәв.
- Мана эмнлһнд «Мини иргч эрдм» гидг төсв күцәгдҗәнә. Терүнә медлд бидн таңһчин сурһульчнрт эмнлһнә үүлдврин, эмчнрин өдр-бүрин тускар келҗ өгнәвидн. Эрүл-менд харлһна көдләчин эрдмин чинр өөдлүлҗ, сурһульчнрт терүнә тускар цәәлһәд, иргчдән эмчин эрдм шүүҗ авхд туслнавидн. Эндр мана тал Лаганя 3-ч тойгта сурһулин күүкд-көвүд ирв. Бидн эн сурһулин бүрдәцлә залһлда батрулҗ, «Мини иргч эрдм» гидг төсв хамдан күцәхәр үгцвидн. Эн сурһулин күүкд-көвүд мана эмнлһнд дәкәд ирхиг күләҗәнәвидн. Эдн дундас кен-негнь эмчин эрдм шүүҗ авад, иргчдән маднда хамдан көдлх чигн биз, - гиҗ таңһчин эмнлһнә ах эмч Чумпина Саглр келв.
Концертин хөөн сурһульчнр цергчнрлә күүндәд, хамдан зурган цокулв. Эн харһлт төрскнч сурһмҗ өглһнд болн тааста эрдм шүүҗ авлһнд туста болснь лавта.
ДООҖАН Наталья