Хальмгин эк-эцкнр 19 төсв белдв

«Медрл» олна ниицән Әрәсән гегәрлтин министерствин дөңгәр эк-эцкнрин седвәрин марһа хойрдад давулҗана. Түрүн марһанд орн-нутгин 5003 дунд сурһулин бүрдәцин эк-эцкнрин комитетмүд орлцсн билә. Терүнд 78 региона 200 эк-эцкин комитет диилвр бәрв. Дииләчнрин тоод Элст балһсна Көглтин Даван нер зүүдг 17-ч тойгта дунд сурһуль орад, мөрә шүүҗ авсмн. 2025 җилд марһана бүрдәһәчнр дииләчнрин тоог дөрвн холванд икдүләд, 700 сай арслңга мөрә өгхәр зуралҗана. Марһана дииләчнрин нерд хөн сарин 30 күртл медгдхмн.
Эн җил эк-эцкнрин седвәрин марһанд 89 региона элчнр 8397 төсв белдәд, эрлһ орулҗ өгв. Тедн дунд Хальмг Таңһчин сурһуль-эрдмин бүрдәцсин эк-эцкнрин комитетмүдин 19 төсв марһанд орлцҗана. Орн-нутгин 7460 сурһуль бас марһлдхмн, теднәснь 2445 сурһуль нидн белдсн төсвән шинрүләд, дуту-дундсинь чикләд дәкнәс эрлһән орулв. Эк-эцкнрин комитетмүд төрскнч сурһмҗин, чик авг-бәрцин, экологин, номин шинҗллтин болн нань чигн талдан төрәр төсв белдв. Марһанд диилвр бәрсн эк-эцкнрин комитетмүд 200-500 миңһн арслң, 500 миңһн - 1 сай болн 1 сай - 2 сай асрлңга мөрә шүүҗ авхмн.
- Эн җил марһанд орлцачнрин то икдв, эн төсв эк-эцкнриг соньмсулҗахнь темдгтә. Эднә комитетмүд дорас өсч йовдг бичкдүдт чик сурһмҗ өглһнә туст төсвс белдв. Ода мана шинҗләчнр сән гисн төсвс йилһҗ авх зөвтә. Мана орн-нутгт социальн чинртә төсвс күцәх саната, олн зүсн кергин седвәр татдг улсин то өсчәхнь йир сән, – гиҗ «Медрл» олна ниицәнә һардач Максим Древаль темдглв.
Эк-эцкнрин седвәр дөңнлһнә марһана тускар Әрәсән эк-эцкнрин комитетмүдин ик хургт келгдсмн. Терүнд Әрәсән Президентин һардврин ахлачин негдгч дарук Сергей Кириенко РФ-н Президент эк-эцкнрин седвәр дөңнлһнд шишлң саңгас 1 җува арслң йилһҗ өгх даалһвр өгснә тускар зәңглсмн. Түрүн марһанд диилвр бәрсн эк-эцкнрин комитетмүд шүүҗ авсн мөңгәрн сурһульчнрин төлә туста керг-үүлдврмүд күцәв.

ДООҖАН Наталья