Мана эмчнрт ханлтан өргҗәнә

Мьянмад һазр чичрәд, кесг күн әмнәсн хаһцсна эс гиҗ күнд шарх-шав авсна туск зәңг һарсна хөөн Әрәсән, тер тоод Хальмг Таңһчин, эмчнр болн әм аврачнр тиигәрән һарч йовад, бәәрн улст дөңгән күргҗәнә. Мана таңһчас дөрвн эмч Әрәсән эмчнрин багин ханьд бас, хойр долан хонгтан тенд көдлҗәнә.

Байн дамшлтта болн өөдән мергҗлттә эмчнр Дорҗин Александр, Болдра Олег, Цевгә Николай болн Цевгә Хоңһр Сикайн балһснд бәәрн госпитальд әмтнд түрүн дөң күргҗ, месллһ кеҗ, эмнлһнә туст сүв-селвгән өгч шавтсн улст килмҗән тусхаҗана. Эн балһснд үүлддг хурлын медлд секгдсн госпитальд өдр болһн шавтсн улс, кергтә эмнлһ авхин төлә ирлцңгү таал тогтагдв. Келхд, эн балһснд һазр икәр чичрәд, кесг тосхлтс нурад унв, бәәрн улс күнд шав авв. Түрүн хойр өдрин эргцд хальмг эмчнр 62 кү хәләв, тедн дунд хурлын ламнр болн бәәрн улс билә. Тиигәд, эмчнр тал ирсн улсас дөрвн күүнд месллһ кех кергтә болв. Хөөннь эдн дәкәд 25 күүнә эрүл-мендин бәәдл шинҗлв, көл-һаран авад, күнд кевәр шавтсн хойр күүг бәәрн эмнлһнд күргәд, дарунь эмнлһ эклв. Эн өдрмүдт хальмг эмчнр ут тоодан хойр зун шаху күүнд дөңгән күргв, күнд шав авсн улст дәкәд месллһ кехәр зуралҗана.
Хальмг эмчнр Әрәсән элчлтлә болн Әрәсән эрүл-менд харлһна министерствин аюлын медицинә орн-нутгин төвин мергҗлтнрлә бат залһлда бәрҗәнә. Шидр аюлын медицинә төвин һардач Алексей Осипов госпитальд ирәд, көдлмшин йовудыг шинҗләд, бәәрн цергллтслә хамцу үүлдврин туск төрмүд хаһлв. Эмчнр бәәрн улсла орчулачин дөңгәр күүндҗ, эмнлһнә туст цәәлһвр өгнә. Генерал Мью Мо Аунг, Сикайн балһсна губернатор У Мьят Чжо бас госпитальд ирҗ, эмчнр ямаран таалд көдлҗәхинь хәләв. Сикайн балһсна эрүл-менд харлһна министр бас хальмг эмчнр көдлҗәдг госпитальд ирв. Эдн бәәрн эмчнрлә хамдан месллһ келһнә тускар күүндв. Келхд, бәәрн эмнлһнд көдлхд ода чигн ик әәмшгтә болҗана, тегәд Әрәсән мергҗлтнр госпитальмудт көдлҗәнә.
Сикайн балһснд Әрәсәһәс ирсн хальмг эмчнр көдлҗәхиг талдан балһсдын улс соңсад, нааран ирхәр седҗәнә. Мана эмчнр цугтаднь дөңгән күргҗ, ңаһан седклән медүлҗ, килмҗән күн болһнд тусхана. Мьянман улс Әрәсәһәс ирсн мергҗлтнриг йоста зөрмг баатрмуд болн цаһан седклтә улс гиҗ тоолна. Бәәрн улс мана эмчнрт ханлтан өргҗ, хол һазрас ирәд эднә зовлң хувалцснь болн шарх-шавинь эдгәҗ дөң күргҗәхнь үнлҗ болшго йовдл мөн гиҗ темдглнә.
Хальмг Таңһчин Толһач Хаска Бату Мьянман улст дөңгән күргх санаһан медүлсн эмчнрт бас ик ханлтан өргв. «Мана нег һазра улс күнд цагла буйнч седклән медүлснь бахмҗта болҗана. Эдн залу-зөрмг, өөдән мергҗлттә болн әмтнд үнн кевәр церглҗәдг улс мөн», - гиҗ Бату Сергеевич келв.
ДООҖАН Наталья
ЗУРГТ: хальмг эмчнр Мьянман бәәрн улст дөңгән күргҗәх кем