Кергтә эм йовулв

Моһа сарин чилгчәр Мьянмад һазр чичрәд, бәәрн әмтнд ик зовлң учрав. Йиртмҗин аюлын ашт кесг күн әмнәсн хаһцв, кесгнь күнд шав авв, зәңг-зә уга геедрв. Келхд, эндр күртл тенд һазр чичрәд, әмтнә җирһлд ик әәмшг учраҗана. Әрәсән, тер тоод Хальмг Таңһчин, һардвр Мьянман улсин зовлңгинь хувалцҗ цуг халхар дөңнв.
Шидр Хальмг Таңһчин эмнлһнә бүрдәцс Мьянман улст олн зүсн эм болн нань чигн кергсл цуглулҗ йовулв. Урднь Хальмг Таңһчин Толһач Хаска Батун даалһврар тиигәрән мана эмчнр һарч йовад, бәәрн әмтнд түрүн дөң күргҗ, шавтсн улст месллһ кеҗ эмнв. Хальмг Таңһчин эрүл-менд харлһна министрин үүл дааҗадг Булат Сараевин зәңглсәр, таңһчин эмнлһс цуһар буйнч седклин кергт шунмһаһар орлцад, шавтсн улст керглгдх олн зүсн эм, кегдлмүд цуглулв. Тер мет тенд көдлсн хальмг эмчнр дор ормднь тогтсн бәәдлиг шинҗләд, ямаран дөң керглгдҗәхинь медүлв.
- Хальмг Таңһчин Толһач Хаска Батун даалһврар мана эмнлһнә бүрдәцс эн кергт орлцв. Шарх-шав эд-бод кедг, түрүн дөң күрглһнд кергтә эм бидн йовулҗанавидн. Әрәсән МЧС-ин шишлң самолетмуд Мьянман улст кергтә тоотыг күргҗ өгхмн, - гиҗ Булат Амангельдыевич келв.
Хальмг Таңһчд үүлддг Әрәсән МЧС-ин заллтын ах мергҗлт Эрнҗәнә Намр цуглулсн эмиг болн кегдлмүдиг Москван мүҗд бәәдг аэропортд күргхмн. Таңһчин эмнлһс ут тоодан 700 шаху киил эм йовулв.
БАТАН Наталья