Анастасия Кривенец Әрәсән марһанд орлцхмн

Шидр Элстд «2025 җилин багш» марһана дииләчнриг ачллһна байрин хург болв. Терүнд Хальмг Таңһчин залврин Ахлач Босхмҗин Гилән, Хальмг Таңһчд ах федеральн инспектор Александр Беляев, сурһуль-эрдмин бүрдәцсин элчнр орлцв.

Муниципальн девсңд диилвр бәрсн багшнр болн сурһмҗлачнр таңһчин марһанд орлцад, эврә сурһуль-эрдмин бүрдәцин нер харсв. Марһана ашар Городовиковск балһсна 3-ч тойгта дунд сурһулин орс келнә болн утх-зокъялн багш Анастасия Кривенец «Җилин багш» болҗ, диилвр бәрв. Лагань балһсна «Тополек» бичкдүдин садын сурһмҗлач Хасыка Оксана «2025 җилин сурһмҗлач», Элст балһсна 20-ч тойгта «Нарн» бичкдүдин садын сурһмҗлач Настан Виктория «2025 җилин этносойлын сурһулин сурһмҗлач», Ик Буурла района Баһ Буурл селәнә сурһулин төрскн келнә болн утх-зокъялын багш Хулхачин Басң «2025 җилин төрскн келнә сән гисн багш» болн Х.Кануковин нертә педагогическ колледжин багш Басңга Арслң «Җилин сән гисн эрдмч» гисн халхар диилвр бәрҗ ончрв. Цугтан эдн 100 миңһн арслңга мөрәһәр ачлгдв. Хальмг Таңһчин Толһач Хаска Батун седвәрәр 2022 җиләс авн багшнрин марһанд диилвр бәрсн улст 100 миңһн арслңга мөрә бәрүлҗ өгдг болсмн. Урднь мөрән кемҗән 15 миңһн арслң тогтаҗасмн.
Хальмг Таңһчин залврин Ахлач Босхмҗин Гилән марһанд диилвр бәрсн багшнриг ачлад, ик күцәмҗ дурдад, эрдмдән итклтә, бичкдүдт дурта улс болҗахиг темдглв. «Багшин эрдм энтн хамгин чинртә эрдм мөн. Тадн бичкдүд өлзәтә сән үрд болҗ өсхд тәвцән орулҗ, үнн-чик седклтәһәр көдлнәт. Тана кергиг баахн багшнр уралан залҗ йовтха. Мана таңһчин сурһуль-эрдмин халхар көдлҗәдг баһчудын то өсч йовтха», - гиҗ Гилән Герасимовна йөрәлин үгдән темдглв.
Анастасия Кривенец болн Басңга Арслң сурһуль-эрдмин көдләчнрин баһ үйин элчнр мөн. Эн җилин сән гисн багшин нер зүүсн Анастасия Кривенец Хальмг Таңһчин нер харсад, Әрәсән марһанд орлцх зөв авв. Баахн багшин келсәр, эн орн-нутгин марһанд диилвр бәрхин төлә цуг арһ-чидлән, медрлән, дамшлтан агсад, ик күцәмҗ бәрхәр зүткх болҗ үгән өгв. Келхд, эн баахн багш урднь «2023 җилин багш» марһанд орлцад, «Педагогический дебют» гидг халхар диилвр бәрсн билә. 2024 җилд болхла «Сурһуль-эрдмин нүүрләчнр» гидг марһанд бас ик күцәмҗ бәрсмн. Анастасия Кривенец хойр җилдән Городовиковск балһсна 3-ч тойгта дунд сурһульд багшлҗана. Эн бичкнәсн авн багш болхар седҗәсмн. Хамдан көдлҗәдг үүрмүднь болн сурһульчнрнь багшиг диилвр бәрснләнь йөрәв.
Байрин хургин йовудт Октябрьск района Мирненск дунд сурһулин багш Чимдә Людмилад болн Приютна района Нартинск дунд сурһулин багш Чонган Нинад «Хальмг Таңһчин ачта багш» өөдән нерн зүүлһгдв. Целинн района Башанкан Андрейин нертә Оватинск сурһулин багш Антона Наталья Хальмг Таңһчин Толһачин Ханлтын бичгәр ачлгдв. Хальмг Таңһчин залврин Ахлач Босхмҗин Гилән багшнрт ачлвр бәрүлҗ өгәд, дорас өсч йовдг үйнрт чик сурһмҗ болн гүн медрл өгч, үнн-чик седклтәһәр көдлҗәдг төләднь ханлтан өргҗ, көдлмштнь күцәмҗ дурдв.

ДООҖАН Наталья