Урһа модд суулһв

Бемб өдрлә Целинн района Троицкое селәнд байрта хойр йовдл болв. Негдвәр, тенд «Балһснд сән кец-таал тогталһн» көтлврин йовудт тосхгдсн амрлһна шин парк секгдв. Хойрдвар болхла, Чувашин Республик бүрдәсн «Өрк-бүлин урһа модн» нертә экологическ керг-үүлдврин йовудт паркд хар модд суулһгдв.
Алдр Диилврин 80 җилин өөнлә болн орн-нутгт зарлгдсн Төрскән харсачин җиллә ирлцүләд, эн керг бүрдәгдсн болдг. Олна кергт Төрскән харсгч Алдр дәәнә ветеран Петр Леонтьев орлцв. Тер мет Чувашин Республикин делегац бас ирсн билә. Чувашин Республикин Олна Палатын ахлачин дарук Алексей Автономов, йиртмҗин көрңгин болн экологин министерствин медлд бәәдг олна хүүвин ахлач Александр Соловьев, «Өрк-бүлин урһа модн» төсвин зүүцүләч Анна Евграфова делегацин ханьд орв.
Анна Евграфован келсәр, ирлцңгү төсв 2022 җиләс авн күцәгдҗәнә. Чувашин Республикин эдл-ахуд урһсн модд Әрәсән регионмудар йовулгдҗ суулһгдҗана. Олн келн-улсиг хоорнднь моддын уңгар дамҗад негдүллһн төсвин һол күслнь болҗана гив.
Керг-үүлдврт Петр Леонтьев орлцсинь темдгтә болв, тер юңгад гихлә ветеран Чувашин Республикин Цивильск района Молды-Косич селәнд һарсмн. Иим кевәр Петр Леонтьевичд нег һазра улстаһан харһдг саам учрв. Модд суулһсна дару күндтә ветеран Троицкое селәнә поштын әңгд одв, энүнә тосхлтд эн орлцсн бәәҗ.
Целинн района муниципальн бүрдәцин толһач Опин Эрднин темдглсәр, суулһгдсн модд иргчдән кесг үйин элчнриг байрлулҗ йовхинь иткүләд, чинртә керг-үүлдврт орлцсн улст ханлтан өргв.
Тер өдр Чувашин Республикәс авч ирсн моддыг Элст балһсна төвд бәәдг Баатрмудын Аллейд бас суулһв. Элст балһсна Хургин ахлач Максим Сорокин, СВО-н ветеранмуд, волонтермуд керг-үүлдврт орлцв.
– Чувашин Республикәс авч ирәд, Элстд суулһгдсн модд балһсна иргнмүдиг болн гиичнриг эрк биш байрлулхмн. Моддын уңг Әрәсәд ниитәһәр бәәдг олн келн-улсин элчнриг негдүлҗәдг темдгнь болна, – гиҗ Максим Александрович темдглв.
2023 җиләс авн Луганск болн Донецк Улсин Республикүдт, Запорожск болн Херсонск мүҗст модд бас экләд суулһгдв. Ода Хальмг Таңһч Цугәрәсән төсвд бас орснь темдгтә болв гиҗ келх кергтә.

ОЛЬДАН Цаһан