Селәнә баһчудыг дөңнх кергтә

Шидр Әрәсән Федерацин Хүүвд Әрәсән баһчудын керг-төрин агентствин һардач Григорий Гуровла харһлт болв. Харһлтыг социальн төрмүдин комитетин ахлач Елена Перминова һардҗ давулв.
Григорий Гуров баһчудын политикин халхд күцәгдсн көдлмшин аш диглҗ, дорас өсч йовдг баһ үйд чик сурһмҗ өглһнә, орн-нутгин регионмудт баһчуд тууҗлгч санл хадһллһна, Алдр Диилврин 80 җилин өөнд нерәдгдсн төсвст ямр кевәр орлцдгин, ямаран регионмудт баһчудын төрмүдт ик оньг өгдгин тускар келҗ өгв.
Сүүрин йовудт Хальмг Таңһчин зака үүдәгч бүрдәцин элч Хачира Борис селән һазрт бәәдг баһчудыг дөңнлһнә төр босхв. «Сүл цагт баһчуд селән һазрас балһсдт нүүҗ һардгнь нуувч биш. Тогтсн бәәдл селәнә делгрлтд ик харшлтан күргҗәнә. Хальмг Таңһчин Толһач Хаска Батун темдглсәр, мана таңһчин делгрлтин төлә селән ик чинр зүүнә. Хәрнь, сүл 7 җилин эргцд орн-нутгт, тер тоод селән һазрт, баһчудын то 44 процентд өсв. Терүнд баһчудын төрмүдт шаңһас йилһгдҗәдг мөңгнә дем өсчәхнь туслв. Хальмг Таңһчд Әрәсән баһчудын керг-төрин агентствин дөңгәр Советин Союзин Баатр Басан Городовиковин нертә баһчудын Гер секгдв. Эн 6,5 миңһн дөрвлҗн метр аһу эзлнә. Ода тенд «Движение первых» олна җисән бәәршлҗәнә, баһчудын төлә олн зүсн керг-үүлдвр давулгдна. Селән һазрт бәәдг баһ наста улсиг эрк биш дөңнх кергтә гиҗ тоолҗанав. Әрәсән баһчудын агентств селән һазрт бәәдг баһ наста улсиг дөңнх шишлң төсв белдхәр зуралҗану угай», - гиҗ Хачира Борис сурв.
Әрәсән баһчудын керг-төрин агентствин һардач Хальмг Таңһчд баһчудын политикин халхар күцәгдҗәдг көдлмшиг өөдәнәр үнлв. Григорий Гуров таңһчин Толһач Хаска Бату баһчудын төрмүдт ик оньг өгчәнә гиҗ темдгләд, ханлтан өргв. Сүл җилмүдт таңһчин хазнас баһчудын төрмүдт йилһгдҗәдг мөңгнә кемҗән 15 холванд өсв. Әрәсән баһчудын керг-төрин агентствин «Баһчудын төлә регион» гидг шаңһа көтлврт мана таңһчин элчнр шунмһаһар орлцдгиг дааврта һардач онц заав. Григорий Гуровин келсәр, баһчудын төрмүд хаһлхин төлә орн-нутгин агентств олн министерствслә хамцу үүлднә, үлгүрнь, селәнә эдл-ахун министерствлә хамдан баһ наста арһлачнриг дөңнлһнә төсв белдв. Келн-улсин төсвс болн орн-нутгин көтлврмүд күцәлһнә йовудт баһчудыг дөңнлһнә керг-үүлдврмүд күцәгднә, тегәд онц төсв белдх зура уга, гиҗ Григорий Гуров цәәлһв.
Баһчудын төрмүдәр болсн харһлтд Әрәсән Федерацин Хүүвин Ахлачин дарукс Инна Святенко болн Константин Косачев, сенатормуд, «Движение первых» олна җисәнә правленя ахлач Артур Орлов, баһ наста зака үүдәһәчнрин Палатын элчнр орлцв. Сүүрт босхгдсн төрмүдәр өргн күүндвр болв, харһлтд орлцачнр орулсн сүв-селвгүд Әрәсән баһчудын керг-төрин агентствин көдлмшт олзлгдхмн гиҗ шиидгдв.
БАТАН Сәәхлә