Дөрвн күүкндән чик сурһмҗ өгхәр

Сүл җилмүдт кесн то-дигәр, мана таңһчд олн үртә өрк-бүлмүдин то өсәд йовхнь байрта йовдл, гиҗ темдглх кергтә. Ахнр-дүүнр өсәд-босад, сурһульта болад, кен-негән дөңнҗ, җирһлиннь туршарт нег-негндән нөкд болна. Целинн района Хар Булгт бәәдг Чабановихнә баахн өрк-бүлиг нег һазра улс сәәнәр меднә. Хоңһр Иванович болн Саглр Николаевна Чабановихн 2005 җилд өрк-бүлән өндәлһв, ода эдн алтн болсн дөрвн күүкән өскчәнә (зургт).

Герин эзн Хоңһр Иванович гертән эврәннь эдл-аху бүрдәһәд, үкрмүд, һахас, такас бәрнә. Мал асрхла амн тоста гиҗ келдг, махнь өндгнь эврә. Саглр Николаевна болхла Хар Булгин дунд сурһульд багшлсн деерән һардачин дарукар көдлнә. Өдрин туршарт эн көдлмштән бәәнә. Ууһн үрнь Баина Хальмг ик сурһулин хойрдгч курсин оютн, Даяна күүкнь дөрвдгч класст сурна, һурвдгчнь Гилән намртан негдгч класст сурхмн, отхн Алтн ода һунта, бичкдүдин садт орна.
Көвү өскхлә йоста баатриг өскдг, күүкиг өскхлә, бүкл келн-улсиг өскдг гиҗ келгддг. Иргчдән күүкд хәрд һарх, тегәд үүл бәрдгиг эрк биш дасх зөвтә. Мел иим кевәр Чабановихн дөрвн күүкән сурһмҗлна. Экнь асхн хәрҗ ирхлә, ууһн Баина күүкнь хотан чанад белдчкнә. Даяна герән ахулад, дүүнрән хәләнә. Терүнәс нань Даяна тхэквондон багд орад, цогц-махмудан батрулна. Эн таңһчин кесг марһаст орлцад ончрсн болдг. Гилән биилхдән дурта.
Чабановихнә үрднь шаңһа дем авна, эннь өрк-бүлд йир сән дөң болна, гиҗ экнь келнә.
2014 җилд Чабановихн экин сертификат олзлад, эврә герән тосхв. Гер дотран сән ясвр кеһәд, өдгә цагин некврлә ирлцҗәдг кец-таал тогтав. Һарсн өдрмүдән, шин җилин байран болн талдан чигн нәр-наадан өнр-өсклң Чабановихн хамдан темдглнә. Цол бәәхлә, Элстд бәәдг ээҗнь ирәд, эдн хамдан шимтә хотан кеһәд, хамдан нәәрләд, цаган сергмҗтәһәр давулна.
Эндр харбулгахн Алдр Диилврин 80 җилин өөнән темдглхәр белдҗәнә. Чабановихнә бүл белдврт шунмһаһар бас орлцҗана. Цөөкн малан асрад, күүкдән өскәд, сурһад чик хаалһднь орулад, кишгтә җирһлинь үзх седклтә баахн эк-эцкин санань күцтхә!
КАРСАНА Евгения