Эрмдгтә улст нөкд болхар

Шидр Х.Б.Кануковин нертә багшнрин колледжин улд гемтә-шалтгта улсин төлә көдлмшч ормсин яарм болв. Терүг Хальмг Таңһчин социальн делгрлтин, күч-көлснә болн көдлмшәр тетклһнә министерств Элст балһсна әмтиг көдлмшәр тетклһнә цергллтлә хамдан «Абилимпикс» регональн марһана медлд бүрдәв. Колледжин һардач Җамбинә Татьяна болн Элст балһсна әмтиг көдлмшәр тетклһнә цергллтин һардач Сумьяна Бэлла керг-үүлдврт орлцачнрт күцәмҗ дурдҗ, тааста көдлмш олҗ авхиг дурдв.

- Мана цергллтд җил болһн эрмдгтә 50-60 күн көдлмш олҗ авхар ирнә. Региональн болн орн-нутгин көтлврмүдин йовудт гемтә-шалтгта улст тааста көдлмш олҗ авхд, немр сурһуль сурхд дөң болнавидн. Эндрк керг-үүлдврт орлцҗадг бүрдәцс эрмдгтә улсиг көдлмшәр теткхдән белн бәәнә, бидн эднд ханлтан өргҗәнәвидн. Дәкәд «Кадры» гидг келн-улсин төсв күцәлһнә йовудт эрмдгтә улсиг көдлмшәр тетксн бүрдәцс шаңһа дем авна. Иим керг-үүлдврмүд эрмдгтә улст туста болдгнь лавта. Эдн көдләчнриг хәәҗәдг бүрдәцсин элчнрлә харһад, күүндәд, соньмсулҗах төрмүдәр цәәлһвр авч, тааста эрдмәрн керг олҗ авна, - гиҗ Бэлла Леонидовна келнә.
Яармд хотл балһсна 10-ч болн 28-ч тойгудта бичкдүдин садмуд, «Читаэнергосбыт», «СУ-38» «Центр учета и отчетности» бүрдәцсин элчнр, Келн-улсин оркестр орлцад, эрмдгтә улсин төлә ямаран көдлмш бәәхин туст тодрха цәәлһвр өгв.
Х.Б. Кануковин нертә багшнрин колледж төгсәсн Өлзәтин Арслң (зургт) эклц классин багшин эрдмтә. Эн яармд орлцад, бийдән тааста көдлмш олҗ авхар ирв. Көвүнә келсәр, эн спортар соньмсна, тегәд дамшачин эрдмәр көдлмш олҗ авх саната. Эн хотл балһсна 28-ч тойгта «Сар-Герл» бичкдүдин садын көдләч Үлмҗин Татьянала күүндәд, ямаран мергҗлт эднд кергтә болҗахиг сурв. Сурһуль-эрдмин бүрдәцд көгҗмин көдләч кергтә, җалвнь 29 миңһн арслң болна. Сәәнәр көдлсн көдләчнр урмдулгч мөрә авна. Бичкдүдин сад нидн болсн яармд бас орлцсн билә, болв ода чигн көдләчиг олҗ авад уга.
«Читаэнергосбыт» бүрдәцин элч Мошулдан Анжелан келсәр, эднд юрист кергтә. Эрмдгтә улс амрлһна кемд немр 3 өдр авна, юрист мергҗлт 39 миңһн асрлңга җалв болн мөрә авхмн.
Керг-үүлдврин йовудт Элст балһсна әмтиг көдлмшәр тетклһнә цергллтин психологуд болн Б.Б. Городовиковин нертә Хальмг ик сурһулин «Центр карьеры» төвин көдләчнр көдлмш хәәсн цагт бийән яһҗ бәрхин, бийиннь тускар яһҗ келҗ өгхин туст сүв-селвг өгв.
ДООҖАН Наталья