Төрскн келән хадһлхар багшнр цуглрв

Эн өдрмүдт мана таңһчд ахнр-дүүнр болҗадг Бурять Республикәс болн Забайкальск крайәс төрскн келнә болн утх-зокъялын багшнр ирсн бәәнә. Ут тоодан 30 багш мана таңһчур ирәд, долан хонгин туршарт төрскн кел хадһллһна болн даслһна туст дамшлтарн хувалцҗана. Шидр хол һазрас ирсн гиичнр Кичгә Төлән нертә Хальмг Келн-улсин болн Зая-Пандитан нертә этносойлын хойр гимназьд, Элст балһсна 12-ч тойгта дунд сурһульд одад, бәәрн багшнрин кичәлмүд хәләсн деерән бийснь бас дамшлтарн хувалцв.

Келн-улсин гимназьд күндтә гиичнриг хальмг авъясар тосад, цаһан хадг татад, ут ду дуулад тевчв. Гимназин һардач Ченкуран Екатерина сурһулин тууҗин, эндрк өдр-бүрин тускар келҗ өгәд, багшнрин болн сурһульчнрин күцәмҗин тускар тодрхаһар цәәлһв. Дарунь гимназин багшнр Альдан Галина, Һәрән Светлана, Шарбан Мария, Ченкуран Екатерина, Очра Элеонора, Дорҗин Татьяна болн Антона Алла эклц болн дунд классмудт хальмг келнә болн утх-зокъялын кичәлмүд давулв. Сурһульчнр гүн медрлән үзүлҗ, хальмг келән сәәнәр дасчахан медүлсинь гиичнр темдглв. Бурятяс ирсн багшнр Светлана Чирнинова, Саяна Будажапова болн Виктория Найданова бас ил кичәлмүдт дамшлтарн хувалцв. Гимназин тууҗин багш Эрднин Мингиян өдгә цага эв-арһс олзллһна тускар соньнар келҗ өгснь гиичнрт таасгдв. Гимназин ээҗ Түмдә Вера багш Чимдә Зоя сурһульчнрла хамдан «Гиичин авъяс» наад үзүлҗ олна седкл авлв. Төрскн келән хадһллһна, даслһна төрәр болсн «төгрг ширән» сүүрт Хальмг Таңһчин, Бурятин, болн Забайкальск крайин багшнр өргн күүндвр тогтаҗ, ухан-тоолврарн хувалцв. Келхд, харһлтд мергҗлтән өөдлүлҗәдг таңһчин райодын сурһульмудын хальмг келнә багшнр бас орлцв.
- Мана гимназьд ирсн гиичнрт цугнь таасгдв. Эдн ил кичәлмүдт орлцад, мана бичкдүд эклц классас авн сурһулян төгсәтлән хальмг келән дасад, өвкнриннь авъяс-заңшалла таньлдҗ, сойлан хадһлҗ билгтә-эрдмтә үрд болҗ өсчәхнь эднд ик бахмҗ үүдәв. Мана багшнрин болн гиичнрин кичәлмүд йир соньн кевәр давв, сурһульчнр гүн медрлән үзүлҗ, сән белдврән иткүлв. Мана гимназьд хальмг кел даслһна туст олн зүсн эв-арһс олзлҗ, бичкдүдин кел өргҗүлҗ, билг-эрдминь делгрүлҗ багшнр аһу ик көдлмш кеҗәхиг гиичнр өөдәнәр үнлв. Энд ээҗнр бас көдлҗәхнь эдниг өврүлв. Мана медәтнр күүкд-көвүдиг хальмг улсин авъясла, сойлла, тууҗла таньлдулҗ, олн зүсн наадд бүрдәҗ, амн үгин зөөрин үүдәврмүд дасна. Төрскн келән даслһна кергт ээҗнр ик тәвцән орулҗахиг гиичнр темдглв, - гиҗ гимназин һардач Ченкуран Екатерина келв.
Энүнә үгәр, хол һазрас ирсн гиичнртән эдн белг бәрүлҗ өгәд, иньгллтин залһлдаһан батрулҗ хамдан нөкцлтх болҗ үгцв.
ДООҖАН Наталья
ЗУРГТ: Кичгә Төлән нертә Хальмг Келн-улсин гимназьд болсн харһлтын кем